Et honderdjaorige bestaon van Boekhaandel Zwikstra in 1998 is veur de Stichting Stellingwarver Schrieversronte anleiding west om mit mekaander een plan te bedaenken veur een biezunder boek: Verrassend Stellingwarfs. Een uniek boek dat zien geliekese niet kent in de aandere streektaelen van oons laand. Niet eerder verscheen d'r een bloemlezing mit twaelf vertaelde verhaelen uut de Nederlaanse literetuur van nao de oorlog van bekende Nederlaanstaelige schrievers en schriefsters. Stok veur stok prachtige verhaelen, die oorspronkelik schreven binnen deur Marga Minco, R.J. Peskens, Marjan Berk, Maarten 't Hart, Margriet de Moor, Cees Nooteboom, Lieve Joris, S. Carmiggelt, Vonne van der Meer, Rudi van Dantzig, Rascha Peper en Adriaan van Dis. Heur enthousiaste mitwarking an dit boek is een geweldige opstikker veur oonze oolde tael. Op verzuuk van Boekhaandel Zwikstra nam de Stellingwarver schriever Johan Veenstra de vertaeling van de verhaelen veur zien rekening en hi'j staot d'r borg veur dat disse verhaelen veur de Stellingwarver leesders nog dichterbi'j kommen, je nog meer raeken en pakken. Een wonderlike ervering!

Deur Verrassend Stellingwarfs kan d'r een aorige wisselwarking op gang kommen tussen et Stellingwarfs en et Nederlaans. Meensken die zelden Stellingwarfs lezen, zullen dit boek lichtkaans wel antugen vanwege et vertaelde wark, en meensken die wel een protte Stellingwarfs lezen, zullen now grif meer boeken van de vertaelde schrievers en schriefsters lezen gaon.

Een boek dat mit dreugen wodt deur subsidies van de Stichting Lezen en de perveensie Frieslaand.

Deur de mitwarking van tal van personen en orgenisaosies is Verrassend Stellingwarfs een uniek boek wodden en niet in et laeste plak deur de veurtreffelike vertaeling.

Een mooier kedo veur een honderdjaorige kuj' je haost niet weensken.

Pieter Jonker - Stellingwarver Schrieversronte
Frits van der Vinne - Boekhaandel Zwikstra

ISBN 90 6466 093 X
1e drok, 1998
Pries € 9,25