24 december – 18.40 – In de kaaste in mien warkkaemer staon een hiele flut oolde elpees. Spul da’k nooit en te nimmer meer dri’je. Mar… as mien webmaster ooit een keer slim rejaol in de tied komt te zitten, het hi’j beloofd om wat elpees van me op cd’s over te zetten. En now ston ik vandemiddag veur die kaaste en docht: welke elpees zollen dat dan wodden moeten? Now, in ieder geval All Time Greatest Hits van de Bee Gees, die elpee gaf ik mezels kedo op ‘e dag da’k veur et riebewies slaegde. In ieder geval ok His 12 Greatest Hits van Neil Diamond en Songs of Leonard Cohen. En wat et Nederlaanstaelige angaot: Voor de overlevenden van Boudewijn de Groot, Levenslang en Dag kleine jongen van Robert Long en Springlevend van Rob de Nijs. Now en dan vermoedelik nog Udolive van Udo Jürgens. Ik daenke dat dat et wel zoe’n betien is. En now mar waachten totdat de webmaster ooit een keer een hiele protte tied over het!
  Now las ik vandeweke in de kraante dat et hielemaole niet goedgaot mit oonze wethoolder Klaas van der Kooij uut Noordwoolde. Die luustert niet goed, drift te vule zien eigen zin deur en zal bi’j de volgende verkiezings grif niet weerommekommen. Wat sneu now toch! Dan hej’ ok malle kastdaegen as d’r zokke dingen over je in de kraante staon! Ik bin vandemiddag mit een kollum an de gang west mit daor wat tips in veur de man om laeter toch nog positief in et gemientelike geschiedenisboek kommen te kunnen! 

23 december – 18.30 – Et boek Het Portaal van Gerard Nijenhuis is een prachtig boek. Ik hebbe et mit groot genoegen lezen. Disse roman van Nijenhuis het hi’j in et Nederlaans schreven. Zien laeste roman Het verbörgen leven schreef hi’j in et Drents. Het Portaal speult in de Middelieuwen bi’j Anloo in Drenthe en gaot over een pastoor van aodellike komof die saemenwoont mit zien kammeraod. Dat kon daor in die tied! In dit boek temeensen. Et is een schitterend, ontroerend verhael. Dit boek zollen de hoge mannen in et Vatikaan verplicht lezen moeten. Mar ja, dat zol vanzels niks uutmaeken. Dat volk is gewoon vusen te dofhudig en hadleers en niet van disse tied. Wel van disse tied is et dat meensken van etzelde geslacht now in Groot-Brittannië trouwen kunnen. Al mag et daor nog gien trouwen hieten. Et ‘homohuwelik’ is veerder wettelik regeld in Nederlaand, België, Spanje en Kannede. Al die vuuf lanen hebben de monarchie as staotsvorm. De monarchie is zo gek nog niet!
  Vandemiddag het breur Jan hier nog even op vesite west veurdat ze op wintersportvekaansie gaon naor Oostenriek. Ik hebbe him zegd dat hi’j oppassen moet dat hi’j de bienen niet brekt op die lange latten. 

Naor de  volgende bladziede - Naor de veurige bladziede