28 december – 18.40 – D’r kwammen een stokmennig mailties angaonde de foto van mien oolde huus in de sni’j. Wat een mooie foto! Een beroepsfotograaf zol et niet beter doen! A’k mit schrieven ophole kan ‘k altied nog fotograaf wodden! Zokke reakties dus. Ik kon d’r zowat niet van slaopen en doe he’k dat allegeer es in me ommegaon laoten. Dat now ja, wat kan mi’j die hiele Stellingwarver schrieveri’je eins ok verhippen a’k op mien zestigste nog fotograaf bi’j de Playboy wodden kan!
  Elk dörp dat een betien mitdoen wil in de wereld het vandaege-de-dag een eigen dörpsvlagge. Mien dörp dus ok. Vandemiddag konnen de meensken de bestelde vlaggen ofhaelen. Et is een mooie vlagge wodden.

De kleur gruun staot veur de mooie netuur mit een protte bos hier bi’j omme, de drie blauwe strepen duden op ‘e revierties Lende, Kuunder en Scheene. En et iekeblad mit de ekkels verwiezen naor et waopen van de femilie Lycklama à Nijeholt. Stamheit Lyckle Ebles woonde vroeger op ‘e stienze Friesburg (of: Liemburg) hier in Ni’jhooltpae. De stienze is in 1514 deur Gelderse soldaoten verwoest. Leden van de femilie, die heur naor et dörp nuumd hebben, liggen hier in de karke begreven. De Lycklama’s hebben in de loop van de tied een protte grietmannen leverd. Aachter de roomse karke in Wolvege is de grafkelder en een kapel van jonkheer Tinco Martinus Lycklama à Nijeholt. D’r kommen trouwens nog zat meensken veur mit die naeme en et kan mar zo dat sommigen niet iens weten dat ze naor mien dörp nuumd binnen. Et is mooi dat zoe’n stok oolde geschiedenis in de dörpsvlagge weeromme te vienen is!

Naor de volgende bladziede - Naor de veurige bladziede