31 december – 17.20 – De sni’j is vandaege aorig lakseerd. Zienderogen smult et vot. Et gaot mi’j eins een betien te rap, die witte wereld was zo mooi om te zien. 
  En now is et jaor al weer haost veurbi’j. D’r wodt niet meer toogd op ‘e boerestreek, mar veur de zekerhied he’k alle losse dingen toch mar in de gerage zet en de brievebusse van et paoltien haeld. Ie weten nooit! De katte het de hiele dag benauwd onder de baank zeten. Bange veur alle knalderi’je op ‘e diek. De overgang naor et ni’je jaor beleef ik al jaoren niet in de Stellingwarven. Ik gao vanaovend op ‘e tied naor Harmen en Jacob in Et Vene. Daor zit ik et oolde jaor uut mit lekker eten en drinken en we gaon naor Youp op ‘e tillevisie kieken. En om middernaacht gao’we de straote op, kriegen we ongetwiefeld weer tuten van wildvremde vrouwluden en gao’we naor et vuurwark kieken. En… hopen we dat et ni’je jaor brengt wawwe d’r van verwaachten. Dat et de lezers van dit dagboek in dat fonkelni’je jaor goedgaon mag! Veul heil en zegen!

Naor de eerste bladziede van 2006 - Naor de  veurige bladziede