1 jannewaori – 16.30 – Ik bin de jaorwisseling in Et Vene goed deurkommen. Doe ’k d’r gisteraovend om even veur zeuven ure henneree was et best mistig, mar doe ’k vannaacht weerommekwam was d’r gien mist meer te bekennen. Ik hoefde dus niet bi’j Haarm en Jacob blieven te slaopen. We hebben netuurlik naor Youp keken en bin nao twaelf ure de weg opgaon en hebben de buurt daore et ni’jjaor ofwunnen en mit mekeer naor et vuurwark keken. Mooi!
Ik zag mezels gister in de jaorlikse ooldejaorsbi’jlaoge van de Liwwadder Kraante, een pagina vol mooi tekende spotplaeties van Frans Faber. Ik hebbe d’r in ’t verleden wel es eerder in staon, mar now omda’k lessend veur de 2500^ste keer argens verteld hebbe. Ik bin mooi tekend en zitte mit een boek in de haand op et mythologische peerd mit vleugels. Pegasus dus, et peerd van de dichters!
Vandemiddag bin ’k naor de studio van Omroep Frieslaand in Liwwadden west. Onderwegens zag ik naost de snelweg, in een lappe laand onder Grouw, vier hatten lopen te weiden. Een mooi gezicht. En ik zag dat d’r een protte riedens weren op ’e Grouwster iesbaene. Ok mooi! In de studio zat ik tussen twie en drie ure in et pergramme De radio op nûmer ien van Jan Durk de Haan. Die praotte mit Rein Tolsma en Jan Durk en Rein praotten mit mi’j over mien stiekelstokkies-tied bi’j de radio. En ik hebbe d’r een splinterni’j stiekelstokkien verteld mit de opwienende titel Fietsehokkeseks. Oolde tieden herleefden dus even, de feniks kwam veur even uut de aske… Ik vien ’t mooi da’k d’r henne west hebbe. Meensken die thuus naor et pergramme zatten te luusteren konnen ok bellen en reageren. En wie belde d’r en kwam zodoende ok even in et pergramme? Webmaster Jan! Veur wie et stiekelstokkien heuren en naolezen wil: et is te beluusteren op dit webstee bi’j Beluuster stiekelstokkien op verzuuk en de tekst staot in de rebriek Gelegenhiedsverhaelen. Hieronder een foto van de studio van Omroep Frieslaand.

Naor de volgende bladziede - Naor de leste bladziede 2008