31 december – 16.30 – Dit is dus de laeste dag van
et jaor al weer. Et is weer veurbi’jvleugen. De eerste tien jaor van disse
ieuw bin al weer omme. Literair was et veur mi’j een best jaor omda’k de
streektaelpries van et Dagblad van et Noorden wunnen hebbe veur mien roman
Et geheim van de wiend! Dat was een hiele uutwinder op 6 meert in
Emmen! Vandaege he’k nog wat kleine klussies daon en verhaelen rippeteerd veur
de optredens van ankem weke. Morgen wodt gewoon een warkdag en gao ’k weer mit
de roman an de gang. Ik gao vanaovend betied naor Et Vene toe mit wat lekkers
van de bakker uut Berkoop in de auto. Bi’j Haarm en Jacob zit ik, zoas
gewoonlik, et oolde jaor uut en dan kom ik vannaacht weer thuus. As et niet al
te mistig wodt… Ik weens alle lezers van dit dagboek een goeie jaorwisseling
en veul heil en zegen in et ni’je jaor! En… wees veurzichtig mit vuurwark.
Zorg d’r veur daj’m morgenvroeg alle vingers nog hebben!
Naor de veurige bladziede
