4 jannewaori 17.00 Gisteraovend is dr een prachtige Britse misdaodserie uut aende gaon op rtl4: Broadchurch. Et schenneleseerde lichem van de elfjaorige Danny wodt op een verlaoten straand in de buurt van zien woonplak vunnen Spannend! Ajm dit mist hebben Morgenaovend wodt et eerste diel herhaeld en komt et twiede diel dr drekt aachteran. Dit wodt genieten!
  Gistermiddag hek alvast een flut bosschoppen in huus haeld veur maendag de zesde. En doe k de boel op e keukentaofel daelezette, stotte k een betien ongelokkig tegen een flesse advekaot an. Dat die vul te pletter op e tegels van de keukenvloer. Wat een smurrie! Ik hebbe hiele malle woorden deur et huus reupen en Boris, die dr vanzels drekt bij was te snuuien, hek de keuken uutbeinseld. Vandemiddag bin k op e fiets stapt en ik hebbe in Berkoop een nije flesse advekaot kocht. Et was wel een lekker fietstochien bij de Kuunder langes!
  Ik hebbe gister en vandaege al verscheiden kaorten veur mien verjaordag kregen. De kaorte hieronder van Ton en Ria uut Haarlem is wel hiel arg mooi. En mit wat dr op staot bin k et almar meer iens! Zo is et!


3 jannewaori 17.00 Op e eerste dag van t jaor schreef mien kollega schriever/dichter/blogger Henk van der Veer in zien internetdagboek: Ondertussen bin ik ut elfde jaar as blogger ingaan, flgens mij binne der in Fryslaan gyn bloggers dyt al langer blogge! Mar argens in de Stellingwarven woont een man Ik hebbe Henk maild: Ik bin in juni vleden jaor mien elfde jaor al ingaon. Reaktie van Henk: Tegare blive we blogge Johan, tt we der bij delfalle Mar nou nch nyt, nch lang nyt!!! Zo is et mar krek, Henk! Snekers en Stellingwarvers bin de echte deurzetters in disse perveensie. Dat zal in Liwwadden wel had ankommen, mar de waorhied moet mar es een keer zegd wodden.
  Nog mar een citaot dan. In de Liwwadder Kraante van vandaege zegt menister Plasterk: Een taal bestaat niet bij wet, maar in de harten en hoofden van mensen. Mar bestaot et Stellingwarfs wel in genoeg Stellingwarver heufden en hatten? As dat zo was zollen de Stellingwarvers heur tael wel deurgeven an de kiender. Mar dat is niet zo. Dus En hoe is dat bij de aandere Nedersaksen? Niet vule beter? Hieronder een kaortien van et Nedersaksisch taelgebied.


Naor de volgende bladziede - Naor de veurige bladziede