6 jannewaori 16.30 Al weer een jaor oolder Vandemorgen in de vroegte hek al een deuze gebak van de bakker in Berkoop haeld en om koffietied henne kwam et eerste koppeltien volk op vesite. Onverwaachs kwammen Egbert en Rieke ok nog. Wat een verrassing! Die bin een dag of wat an disse kaant. Om de middag henne kwammen Sieger en Geertje, die hebben hier sop en bolties had. En now komt Pieter hier zodaolik. Die krigt hier waarm eten: sop en huspot mit een hiempe gelderse wost. En dan komt dr vanaovend weer een koppeltien volk. En ik doe de hiele dag niks as redderen. Mar et is wel hiel gezellig. En dan moek mar perberen en hool ok in et kommende jaor et platte van de voeten onder.

5 jannewaori 16.40 Vandemorgen hek de kastboom oftuugd en dat is me goed lokt. Ik hebbe alle takkies mit de verschillende kleuren in bossies bundeld mit een briefien dr bij. Veur Boris was et ien groot feest. Die raekte hielemaole wild in de kop, besprong de takken en trok an de liende mit laampies omme. Risseltaot: iene stokkende kastballe. Et hadde nog vule malder beteren kund. En now hoop ik mar dak dat verhipte ding an et aende van et jaor allienig opzetten en in mekeer kriegen kan, want aanders moek de hulptroepen uut Berkoop weer bellen en dat zol vanzels een vreselike ofgang wezen.
  Vandemiddag hek een aentien kuierd mit dit mooie weer. Ik was krek weer thuus doe Peter en Geertje an de deure kwammen om me te fielseteren, mar ik bin morgen eerst jaorig. Och, we won allemaole een jaortien oolder en hool alles dan mar es op e riegel Ik hebbe alvast een panne sop kookt en een pannegien mit huspot klaormaekt, want ik kriege morgen zowel middags as aovens eters. Dat vien ik wel gezellig!
  Vanaovend hek trouwens een perbleem. Boer zuukt vrouw en Broadchurch won veur een pat toegeliekertied uutzunnen. Ik kieke dus naor Broadchurch en bekieke Boer zuukt vrouw laeter wel op e komputer. Hieronder een foto uut de prachtige serie Broadchurch. Olivia Colman en David Tennant as de pelisies Ellie Miller en Alec Hardy. Zij moen de moord op e elfjaorige Danny Latimer zien op te lossen.


Naor de volgende bladziede - Naor de veurige bladziede