10 jannewaori 17.00 Et regende gisteraovend as de zee doe k weerommekwam van Ooldeboorn. Wat een rotweer! De rutewissers konnen et mar kwaolik behappen. Dan hek aorig liever wat vriezend en zunnig weer. Mar et liefste zok mooi veurjaorsweer hebben! Een vrouw miende gisteraovend dak twie jaor leden ok bij heur in Ooldeboorn west was te vertellen. Mar in warkelikhied was et al zeuven jaor leden. Zo hadde gaot de tied. Hij ontflut oons an alle kaanten. Omdat et vandaege zunnig was bin k op e fiets naor Wolvege gaon en daor hek even bij Jan zien moeder op vesite west. Dat wodde ok weer meer as tied. Ik bin krek bij de Lende langes weerommefietst. Hieronder een foto van vandemiddag. Hooltpae mit op e aachtergrond de Stephanuskarke


9 jannewaori 17.00 De Keuninklike Biebeltheek in Den Haag bestelde vandaege een exemplaor van oonze unieke grafiekmappe 200 jaor Keuninkriek plus et bijbeheurende infermaosiecahier. Dat is mooi! Daor heurt zoks vanzels ok te wezen!  
  Vanaovend zak verhaelen vertellen veur de leden van t Nut in De Jister in Ooldeboorn. Ik bin dr in 2003 en 2007 ok west te vertellen. Ik hadde dr eins vleden jaor op 24 jannewaori henne zuld, mar doe hak de griep. Vandaor dak vanaovend een herkaansing kriege. Ik hebbe dr wel nocht an!
  Hieronder een foto van vandemorgen. Ik bin Boris en ik ligge hier lekker op een oolde rookstoel in een kaemertien boven op e zoolder. Zo kom ik de dag wel deur!


Naor de volgende bladziede - Naor de veurige bladziede