12 jannewaori – 17.00 – Kammeraod Douwe (Kootstra) leut me weten dat hi’j vandeweke van maendag t/m vri’jdag elke aovend te zien is in et pergramme BYNT van Omroep Frieslaand. Hi’j vertelt dan et beroemde volksverhael De smid fan Earnewâld vanuut de smederi’je van et skûtsjemuseum De Stripe in Eernewoolde. Douwe vertelt elke aovend ongeveer drie menuten. Ik zal kieken!
  Ik hebbe vandaege een kollum veur de kraante schreven en zo now en dan even naor et hadrieden op ’e tillevisie keken, mar dat interesseert me lange niet zovule meer as vroeger in de tied van Ard en Keessie. Ik kieke trouwens wel uut naor de Olympische Winterspeulen. Zoks vien ik altied wel mooi!

11 jannewaori – 17.00 – Vandemiddag he’k verhaelen verteld in Maasstee in Assen veur de leden van biljartverieninge De Nieuwe Hoek plus anhang. Mit mekeer weren d’r een zestig meensken. Et vertellen gong prima en et was hiel gezellig. En netuurlik kree’we rollegies. Dat heurt zo aj’ in de eerste helte van jannewaori in Drenthe binnen. Nao mien optreden gongen ze nog oold-Hollaanse spullegies doen en d’r was een verlotting om de kosten van de middag weer boven waeter te kriegen. Want ja, de Stellingwarver schriever reist niet veur niks of naor Assen…. Mar doe zat ik al weer in de auto naor huus toe!
  Ik hebbe now vekaansie en hoeve pas weer op te treden op 7 feberwaori. Dat he’k bewust zo inpland. Ik zol eerst ok echt op vekaansie, mar dat gaot niet deur. Ik hoeve me trouwens gien tel te vervelen. Ik moet de kommende weken nog hiel wat doen veur oons grafiekprojekt 200 jaor Keuninkriek. Ik bin wel van doel en gao een peer keer naor een museum toe. Hieronder een foto van vandemiddag. Dit is et gebouw Maasstee daor a’k vandemiddag verteld hebbe.


Naor de volgende bladziede - Naor de veurige bladziede