16 jannewaori 17.00 Ik bin now een volleerde koekebakker! Ik bakte al geregeld lekkere kruudkeeks in de ovend. Dat is trouwens niet zo muuilik. Ie kun in de winkel pakkies spul kopen en dan hoej dr allienig nog mar wat waeter bij te doen. Ik dee dr dan vaeke ok nog rezienen en sukade deur, mar makkelik bleef et. Mar now kreek veur mien verjaordag van Anke een wat groter bakblik en alles waj neudig hebben veur et maeken van een kruudkoeke. Mit et recept! En dat hek dus uutperbeerd. Dit hak allegeer neudig: 250 gram zelsriezend bakmael, 3 eier, 100 gram botter, 150 gram lochtigbrune suker, een deciliter soepe, snipperties van een sinesappelschelle, 75 gram fien sneden sukade, 75 gram fien sneden gember, 75 gram wiekte rezienen, 3 theelepels keneel, een halve theelepel maelde kruudnaegel, 1 theelepel gemberpoeier, amandelsnippers en een mespuntien zoolt. En doe bin k an t prutsen gaon en ik hebbe me toch een lekkere koeke bakt! Geweldig! Vule lekkerder as dat spul mit wat waeter dr bij. Dat now ja, dit gaok vaeker doen, want ik bin now een volleerde koekebakker!
  Vanaovend kriek Jan en Durkje uut Wolvege op vesite. Ik bin ze vleden haast op een mooie dag al fietsende op et Scheenepattien aachter Hooltpae tegenkommen en doe hewwe ofpraot dat ze es kommen zollen. En dat zal now dus wezen. Ik hebbe lange jaoren mit Jan op e zelde ofdieling van et belastingkantoor in Et Vene zeten. Et is dus een oold-kollega!

15 jannewaori 17.00 Om half elven bin k vandemorgen in Wolvege op e trein stapt naor Liwwadden toe. Aanders bruuk ik altied ien van mien zeuven jaorlikse 60-plus-kaorties, mar et is vanzels gekkewark om zoen kaortien te bruken aj mar naor Liwwadden gaon. Daor kon k toch al mit veertig percent kotting henne en ik hebbe now dus veur de eerste keer in- en uutcheckt mit mien ov-chipkaorte. In Liwwadden vergat ik haost om in te checken. Ik zag dat een vrouw dat dee, aanders wak zo de trein ingaon. In Liwwadden hek et nije Fries Museum bekeken. Et is een prachtig museum wodden en de inrichting is ok hiel mooi. Ik hebbe uutgebreid Et verhael van Frieslaand en Oold geld bekeken. Mar waoromme die Jort Kelder daor een filmd verhael holen moet? Ik hebbe hielemaole niks mit die man. Netuurlik hek et Fries Verzetsmuseum ok bekeken. Hiel ontroerend vun ik daor et filmpien over de joodse Liwwadder femilie De Jongh, die in de oorlog heur huus uut mos om votbrocht te wodden. Ik zag ze bepakt en bezakt votlopen. De dood integen Even laeter ree dr een verhuuswaegen veur om et huus leeg te haelen. De overbuurman hadde indertied alles filmd. Et blift angriepend ok zoks te zien. Angriepend vun ik ok et peer soldaotekissies van een vliegenier die bij Ferwerd naor beneden scheuten was. Morgens hadde hij die schoenen nog antrokken. Et zol zien laeste dag wodden. Now staon ze in een vitrine in Liwwadden en ik ston dr naor te kieken Naodak alles zoen betien bekeken hadde hek in et resteraant van et museum wat eten. Et zal me benijen hoe et now veerdergaot. Hebben ze, om de loop dr in te holen, in de toekomst genoeg biezundere tentoonstellings zoas et Drents en et Grunnings Museum dat hebben? Aanders daelt et tal bezukers nao verloop van tied sebiet. Ik vien et Zaailaand trouwens niet geweldig. Daor hadden ze wat grotere bomen daelezetten moeten. Die prikkeboel die dr now staot is me niks weerd. Hieronder de Liwwadder binnenstad op een slim trieste jannewaoridag.


Naor de volgende bladziede - Naor de veurige bladziede