18 jannewaori 17.30 Gisteraovend belde Jan de webmaster as hij wel even langeskommen kon. Ik docht dat hij praoten wol over de fanmiddag op 15 feberwaori, mar hij hadde een nije komputer veur me bouwd. Hij vun dat dat ding van mij zo staorigan vusen te traoge was. Dat was mezels nog nooit opvalen, mar toe dan mar. Dat hij an t wark. Op et laeste bleek dat hij mien adressebestaand niet overhevelen kon naor de nije komputer. Ik zol dus eerst twie komputers bruken moeten. Mien hemel nog an toe. De ontreddering sleug toe. En alles zag dr aanders uut en ik bin zo vreselik traoge van begrip as et dit soort dingen betreft. En ik snapte mar niet hoe ak kopiren mos. Dat dee ik altied op een meniere daor Jan weer gien weet van hadde. We hebben eerst mar besleuten dak veurlopig deurgaon zal op e oolde komputer. En as hij dan wet hoe et adressebestaand overheveld wodden moet, zuwwe dr weer es mit an de gang. Ik hebbe vleden jaor een nije tillevisie kregen en wus dus ok niet meer hoe ak now een dvd ofspeulen moet. Dat hek mitien mar vraogd. Hij het et me uutlegd en ik hebbe op een briefien schreven op welk knoppien van de ofstaansbediening ak drokken moet. Doe Jan de webmaster vot was ontdekte k dat hij wat mit de tillevisie daon hadde. Ak et geluud op et alderhadste zette kon k et nog mar kwaolik verstaon. Tillefonisch het hij me doe uutlegd hoe ak dat verhelpen kon. Dat is wonder boven wonder nog lokt ok. En doe bin k kompleet uutteld mit Boris op e schoot op een stoel zitten gaon en ik docht: Wak mar een katte. Dan kon k lekker bij een aorige man op e schoot liggen, dan kreek zo now en dan lekkere whiskas van die aorige man, en hak niks mit techniek en komputers te maeken. Wat liekt me dat een heerlik leven!
  Zokrek het Pieter dr even west om de kraanten. We hebben vandaege tillefonisch ok van alles en nog wat bepraot over oons grafiekprojekt 200 jaor Keuninkriek. Et projekt is op 12 meert hielemaole klaor!

17 jannewaori 17.00 De Johan Veenstra-fanmiddag belooft een prachtmiddag te wodden. Ik blieve et nog altied een betien overdreven vienen dat zoks veur mij orgeniseerd wodt, mar Jan de webmaster dot dat dan toch mar. Wie was aanders ooit op zoen idee kommen? Wie aanders zol dit ooit veur me daon hebben? Gieniene! Hulde dus an Jan de webmaster! Dr hebben heur now al 30 meensken/dagboeklezers opgeven veur de middag van de 15de feberwaori in et gebouw van de Schrieversronte in Berkoop en ze kommen overal weg. Dr wodt tunteld dat dr ok nog een ploegien volk uut Twente kommen zal Aanst moen we et Drafcentrum nog ofhuren! Mien goeie kammeraod, de Friese schriever Douwe Kootstra, zal me die middag interviewen en een speciaol veur die middag schreven kollum veurlezen/vertellen. Ik gao zels netuurlik ok vertellen en we gaon mit mekeer op petret. As dat kan Now ja, et wodt een geweldige middag! Hier zal nog lange over naopraot wodden!
  Vandemiddag hek Janneke nog een keer op vesite had. We hebben praot over et leven en dat dat niet altied mitweert. Mar dawwe veerder moeten en alle dingen, die oons soms mal en onverwaachs over t mad kommen, een plakkien geven moeten. Dawwe op e duur vrede hebben moeten mit hoe et bijtieden in et leven gaot.

Noar de volgende bladziede - Naor de veurige bladziede