24 jannewaori – 17.00 – Op mien verjaordag kree ’k een dvd mit een dokumentaire over Walter Süskind, de Nederlaanse Oskar Schindler. Die dvd he’k now bekeken. In Amsterdam wodden Joodse Nederlaanders eerst bi’j mekeer brocht in de Hollaanse Schouwburg, veurdat ze op traansport mossen naor Westerbork en de koncentraosiekampen in et oosten. Tegenover de Schouwburg was een crèche waor kiender, scheiden van heur oolden die in de Schouwburg zatten, opvongen wodden. Van die kiender wus Süskind mit een stel goeie helpers d’r zowat duzend te redden uut de klauwen van de nazi’s. De Joodse Süskind hadde percies de goeie kontakten bi’j de Duutsers, hi’j praotte Duuts zonder aksent en hi’j speulde zien levensgeveerlike dubbelrolle perfekt. Mar hi’j betaelde een torenhoge pries veur zien moed. Hi’j en zien huusholing wodden in Auschwitz vermoord. Vrunden en kiender, die hi’j redded het, vertellen in de dokumentaire over disse biezundere man. Een meer as indrokwekkend stok geschiedenis! Hieronder een foto van Walter Süskind mit zien dochtertien Yvonne.


23 jannewaori – 17.40 – Gistermiddag wa’k in Et Vene, vandemiddag wa’k d’r al weer. Ik hebbe eerst naor mien kapster west en doe die me goed naokeken hadde bin ’k naor Jan de webmaster gaon om et pergramme deur te nemen veur de Johan Veenstra-fanmiddag op 15 feberwaori in Berkoop. Et wodt ongetwiefeld een mooie en biezundere middag!
  Gisteraovend he’k op et puntien van de stoel zeten tiedens de superspannende thriller Half Light. Nao een menuut ha’k al in de gaten da’k de film al es eerder zien hadde, mar de spanning gierde me weer deur de huud. Wat een prachtige film! Vrouwluden die van heurzels een protte centen hebben doen d’r dus goed an en hool heur man goed in de smiezen. Want veur daj’ d’r arg in hebben perbeert zoe’n smiecht je, mit hulpe van je beste vrundinne, van kaant te maeken om de centen opstrieken te kunnen. Hieronder een foto uut de film. Hans Matheson as Angus McCulloch en Demi Moore as Rachel Carlson.


Naor de volgende bladziede - Naor de veurige bladziede