2 feberwaori 16.40 Ik drome altied hiel wat of en meerst bin et minder mooie dromen. Mar vannaacht hek wondermooi over mezels as klein joongien droomd. Et was hiel ontroerend. Ik daenke dak daor mar een kollum over schrieven gao.
  Zoas haost alle jaoren hek in verbaand mit de Nationaole Gedichteweke vandemorgen twie gedichten veurlezen in et pergramme van Radio West-Stellingwarf Centraol. Twie gedichten die k vleden jaor schreven hebbe: Flessien en Woorden.
 
Ik bin in et verleden nooit een fan van Ramses Shaffy west. Netuurlik vun ik sommige lieties mooi zoas Pastorale dat hij tegere mit Liesbeth List zong. Mar veerder vun ik et een man die zien leven kompleet vergriemde mit draank en drugs. Oerstom! Vandemorgen hek bij uutzending mist et laeste diel bekeken van de tillevisieserie Ramses. Wat was dat een geweldig mooie serie! Ik hebbe et allegeer mit et grootste genoegen bekeken. Maarten Heijmans speulde echt de steerns van de locht. Wat prachtig! De rillings leupen me over de rogge, doe hij mit Noortje Herlaar, die Liesbeth List speulde, Pastorale zong. Et was ontroerend mooi! Hieronder een foto uut de serie mit Maarten Heijmans en Thomas Cammaert as Ramses Shaffy en Joop Admiraal.


1 feberwaori 17.20 Doe k gisteraovend vanuut De Harkema weerommeree naor huus begonnen dr twie kontrolelaampies te knipperen/branen. Jakkes nog an toe ok. Dr is me haost niet minder. Thuus zag ik in et instruktieboekien dat et een moterstoring betrof en een storing an et uutlaotgaskontrolesysteem en dak sebiet naor een gerage rieden mos. Op vrijdagaovend Vlak veur et weekaende Maendagmorgen zak dr drekt henne. Daoromme hek de auto vandaege mar es goed wusken. Dat doe k aanders nooit, mar dat ding was zo verschrikkelike smerig dak dr zo niet mit naor de gerage durve. Vannaacht wak bange dak zels ok naor de gerage mos. Ik hebbe twie aovens argens aanders eten en dat is niet echt goed gaon, dat ik kreeg beheurlik kramp. As zoks deurzet kan dr ok zo weer spraoke wezen van een daarmofsluting en moek weer naor et ziekenhuus. Mar et is veureerst weer bekommen. An et aende van ankem weke zak drie keer argens aanders eten. Mar is dat wel verstaandig? Ik zal et de kommende daegen even anzien. Die rothuud ok altied!

Naor de volgende bladziede - Naor de veurige bladziede