4 feberwaori 17.00 Vandemiddag hek naor Pieter in Oosterwoolde west veur oons grafiekprojekt 200 jaor Keuninkriek. De prenten (etsen, hooltgravures en een meerkleurehooltsnede) bin allegeer klaor en we bin now doende mit et infermaosiecahier dat drokt wodden zal bij de Keuninklike Van Gorcum in Assen.. Pieter het zien stokkies tekst over de grafici schreven en ikke de tekst over de keunings/keuninginnen. Morgen zal Pieter naor vormgever Sijtze Veldema in Dwingel die dr een mooi infermaosiecahier van maeken gaot. Dat komt dan mit de acht deur de keunsteners signeerde prenten van de keunings/keuninginnen in een mooie mappe. Dr won 100 mappen maekt. Veur 12 meert zal alles in ieder geval klaor wezen. Inlichtings/bestellings: info@stichtingnobilis.nl
  En dan nog even over die mooie tillevisieaovend van gister. Ik zag et spannende aende van de twiede serie van Dokter Deen en et eerste diel van de dadde serie van de Deense prachtserie Borgen. Dat was en wodt genieten! Hieronder een foto uut de dadde serie van Borgen. Sidse Babett Knudsen (links) speult de politika en vroegere Deense menister-president Birgitte Nyborg en Birgitte Hjort Srensen (rechts) speult de tillevisie-journaliste Katrine Fonsmark


3 feberwaori 17.00 Vandemorgen om negen ure wak al mit mien auto mit knipperende en branende kontrolelochies in Et Vene bij de gerage en ik hebbe daor een malle bok reden. Et eerste wat ze me daor vreugen, doe k uutlegd hadde wat dr an schilde, was mien autonommer. En ik wete best wel dat mien auto een nommer het, mar ik hebbe waorlik gien idee welk nommer. Dat ik mos even butendeure om mien eigen autonommer op te schrieven. Dat vienen zokke stoere geragemannen grif verschrikkelike stom! Mar et is niet aanders. Ik kan aanderhalf ure zonder stoeken te blieven uut eigen wark vertellen, mar mien eigen autonommer kan k niet ontholen. De boel is trouwens drekt even maekt. Et was mar een kleinighied. De gerageman het me ok verteld wat dr an schilde, mar mien hassens weigeren alle technische infermaosie op te nemen. Dat week dus niet meer. Ik viene trouwens dat mien hassens groot geliek hebben. Wat moek mit al die onnutte kennis?

Naor de volgende bladziede - Naor de veurige bladziede