8 feberwaori 18.30 Ik bin bliede dak gisteraovend mit de gammele huud toch naor Sneek west hebbe. Ik hebbe daor een prachtaovend had in et nije Theater an de Westersingel. Heabeltsje was zoas altied geweldig. Et was allienig slimme sneu dat de man van heur vrundinne Molly en de man van buurvrouw Peereboom dr beidend vandeur gaon weren mit een jongere vrouw Mar ja, as een kerel inienend veraanderd van ondergoed en de witte Jansen en Tilanus onderbroek verruilt veur een vule medernere Bjrn Borg En as zoen kerel in plak van ien keer in de weke iedere dag onder de does gaot, dan is dr wat te redden en in de regel goed wat mis. De Grande Dame van Sneek was dus weer geweldig op dreef en is mit niks te vergelieken. Zij is uniek en de Bonte Sneker Aovend is uniek. Hadden wij zoks mar in de Stellingwarven, mar zoks hebben ze nargens aanders as in Sneek!
  Vandemiddag bin k al weer naor Sneek west. Jelle viert vandaege zien verjaordag. Hij komt mij altied een jaor nao en dat moet nog mar even zo blieven. Ik hebbe alle lekkers an me veurbijgaon laoten. Een peer koppies thee en een koekien, meer waog ik me (nog) niet an.
  En vanzels hek op e tillevisie en de radio (onderweg naor Sneek) mitleefd mit et goold, zulver en broons in Sotsji. Hiel mooi!


7 feberwaori 17.20 Ik was vandemiddag in Jubbege, daor moch ik verhaelen vertellen veur de leden van de Anbo. Ik was dr al veur de zesde keer, dat ik hebbe de laeste weke drok doende west en leer een stel oolde verhaelen weer uut et heufd. En now mar hopen dat ze niet meer wussen dak die tien jaor leden of langer ok al es verteld hebbe. Nao et opgtreden in Jubbege wak van doel en reis drekt deur naor Sneek. Daor zok eten bij Jelle en Gerda en dan zowwe, zoas alle jaoren, mit Doutzen naor de Bonte Sneker Aovend. Tante Heabeltsje viert heur verjaordag weer en dat betekent dat ze tiedens meerdere aovens mar liefst vierduzend meensken op vesite krigt. De Sneker Aovens bin ontzaggelik populair en dit jaor veur et eerst in Theater Sneek an de Westersingel! Ik komme dr al jaoren, mar ik hebbe Sneek vandemorgen ofzegd omdak, nao et eten van gisteraovend, de huud flink overstuur kregen hebbe en vannaacht zodoende gien oge dichtedaon hebbe. Mit thee en beschuten perbeer ik de boel weer wat op gang te kriegen. En dat gaot ok wel weer. Et optreden in Jubbege kon k wel doen en dan gaoj daenken Zak toch mar naor Sneek? Et is altied zo mooi. Dat now ja, ik gao aanst toch! We zien wel hoe et komt. Hieronder een foto van de website van Henk van der Veer. De Sneker Diva Heabeltsje de Jong mit burgemeester Hayo Apotheker.


Naorr de volgende bladziede - Naor de veurige bladziede