16 feberwaori 17.20 Mien moeder zol vandaege jaorig west hebben. Op et karkhof hek een keersien ansteuken. As ze et gistermiddag in Berkoop zien en mitmaeken kund hadde, wat zol ze dan geneuten en wies op me west hebben! Daor bin k hiel arg wisse van. Een fanmiddag veur dat kiend van heur, waor ze grif wel es over inzeten het! As die him laeter mar redden kunnen zol Ik geniete  de hiele dag nog wat nao. Et was echt biesterbaorlik! Ik hebbe ok van alderhaande meensken kedogies kregen. Dat is toch te gek! Dat hadde toch niet hoefd! Mar Boris en Joris bin wel hiel arg bliede mit de blikkies kattevoer!
  Tiedens de fanmiddag hewwe dr gister twie Olympische medallies bijwunnen. Sjinkie Knegt uut Bantege (!) wun broons mit de 1000 meter shorttrack en Koen Verweij zulver op e 1500 meter hadrieden. Een Pool bleef him drieduzendste van een sekonde veur Verdikkeme nog an toe ok! Dan bin de droeven zoer! De iene is ontzaggelik bliede mit broons, de aander ongelokkig mit zulver Ik snappe dat wel, mar toch Ie hadden dr ok henneknoffelen kund, dan haj niks had.
  Vandemiddag was et weer ien groot medallie-feest! Jorien ter Mors (goold), Ireen Wst (zulver) en Lotte van Beek (broons) op e 1500 meter hadrieden. We hebben now al 17 medallies! En we bin dr nog niet. Dit zal grif hiel lange niet meer gebeuren! Doe daor mar daenken omme. We beleven wat biezunders! Hieronder Jorien ter Mors nao heur goolden rit!


15 feberwaori 18.00 Vandemorgen bin k deur Douwe Heeringa interviewd veur Omroep Frieslaand-radio in verbaand mit de Johan Veenstra Fanmiddag! Douwe verwaachtte dat vrouwelike fans me anraeken willen zollen Et is me ok wat! Welke schriever overkomt dit? Is dit ooit een Friese schriever overkommen? Of Jan Siebelink, Adriaan van Dis, Connie Palmen, A.F.Th. van der Heijden? Ik daenk et niet! Mar mij dus wel! Mit grote daank an webmaster Jan, die op et idee kommen is. En de ankondiging hadde allienig mar op mien webstee staon. As dit ok in de kraanten staon hadde, hawwe sporthal De Steense in Wolvege vermoedelik ofhuren moeten! We weren vandemiddag mit zoen vuuftig meensken. Dr was zels een koppeltien volk van Twentaal uut Twente! Sietse de Vries van de Liwwadder Kraante was dr ok en dr kwam ok nog een fotograaf. Et is een mooie middag wodden! Wat zeg ik? Et was een prachtige middag! Et het me meraokelse goed voldaon. Douwe het me interviewd en we hebben tegere verhaelen verteld. Douwe hadde speciaol veur disse middag een kollum schreven. Et bleek dat hij wel een betien ofgeunstig op me was, mar dat hoeft vanzels niet. Ik kan niet zokke prachtige reisverhaelen schrieven! Ik vun et ok slimme mooi dat dr goenend weren daor ak vroeger mit op e ulo zat. Die wonen now in Wolvege, Vledder, De Jouwer , Sneek Wat een verschil hebben die zien. Dat schaemele joongien van vroeger en hoe ak now bin. We bin netuurlik ok mit mekeer op petret kommen. Hieronder twie fotos. Links: Een groepsfoto. De schriever en zien fans. Rechts: De schriever en de jongen en maegies daor hij vroeger mit op e ulo in Wolvege zat. Jan de webmaster het de fotos maekt!


Naor de volgende bladziede - Naor de veurige bladziede