18 feberwaori – 17.20 – In elf van mien twaelf ammarillen he’k dit jaor knoppen. Dat is geweldig, mar wat nog geweldiger is… In vuuf bollen he’k iene staele mit bloemen, in vuuf bollen he’k twie staelen mit bloemen en…in iene bolle he’k mar liefst drie staelen mit bloemen. Dat is me echt nog nooit overkommen! Et is onveurstelber! Ik hadde krek zo goed bloemist wodden kund!
  D’r kommen nog altied mailties van fans, die me weten laoten dat ze zaoterdagmiddag zo geneuten hebben. Dat is allegeer prachtig! Ik hebbe ok geweldig geneuten! Van Griet en Kerst, die vroeger in Ni’jhooltpae woonden, kwam d’r een kaorte. Ze fielseteren me mit de fanklub! Misschien dawwe zoe’n fanmiddag over twie jaor nog es weer doen kunnen. In et jaor da’k 70 wor… Dan he’k grif wel wat verlet van wat fleurigs…
  Een Rus en een peer Noren hadden heur ofmelded veur de tien kilemeter hadrieden van vandemiddag in Sotsji. Wat een allemachtige sloppelingen! As ze daenken dat ze ’t niet winnen kunnen, doen ze niet mit. Bin dat de ofstammelingen van Tsaar Peter de Grote en Eric de Noorman? Die kerels hadden vroeger aorig meer kont in de broek as die slopjanussen van hadrieders van vandaege-de-dag! Now ja, et regende dus weer Oranje-medallies! Mar misschien wel in een betien aandere volgodder as mennigiene docht hadde… Jorrit Bergsma (goold), Sven Kramer (zulver) en Bob de Jong (broons). We hebben now al twintig medallies… Hieronder Jorrit Bergsma uut Ooldeboorn, een geweldige winner!


17 feberwaori – 17.30 – Vandemiddag zat ik in Butenpost. Ik moch daor verhaelen vertellen veur de bewoners van Haersmahiem. Dat hadde al in november zuld, mar doe mo’k ofzeggen vanwege de spierspannings-heufdzeerte. Ik kreeg now dus een herkaansing en et was hiel gezellig. Ze zeden da’k daor es weer kommen mos… Onderwegens naor huus schalde et Wilhelmus bi’j me deur de auto vanwege de huldiging van de vrouwluden die gister de 1500 meter zo meraokels reden hebben.
  Vandaege staot d’r een verslag van Sietse de Vries in de Liwwadder Kraante van de Johan Veenstra Fanmiddag van eregister in Berkoop. Hi’j nuumt mi’j de altijd aimabele Veenstra… Ja, mar d’r bin greenzen! Laot dat hiel dudelik wezen! Ik kreeg trouwens verschillende aorige reakties naor anleiding van zaoterdag en dit stok in de kraante! Wie dat kraante-artikel lezen wil, kan et op mien webstee anklikken! Jim vienen et boven Internetdagboek. Jim kun daor ok klikken op een hiele riegel foto’s die zaoterdagmiddag maekt binnen. Extra service van de webmaster! De foto’s bin deur him maekt. Een mooi andaenken an een mooie middag! Hieronder nog een foto van zaoterdagmiddag. Ik praote hier even mit de meensken van de Stichting Twentaal: Gertjan ter Harmsel, Thea Kroese en Gerrit Dannenberg. Zi’j kwammen hielemaole vanuut et vere Twente naor Berkoop!


Naor de volgende bladziede - Naor de veurige bladziede