20 feberwaori 17.00 Ik hebbe et boekien De ziel van Oranje lezen. Et bin gesprekken van Coen Verbaak mit zes historici over 200 jaor Keuninkriek.
  Dr bin vandaege gien Oranje-medallies te winnen in Sotsji. Ik hebbe dr wel een pikante kollum over schreven en die hek vandaege nog es goed naokeken en doe naor de kraante stuurd.
  Ik mag vanaovend verhaelen vertellen veur de plattelaansvrouwluden van Et Bildt in mfc Ons Huis in St. Anneperochie. In 1995 en 2000 bin k dr ok west te vertellen. Ik mag graeg op Et Bildt kommen, dat et wodt grif een mooie aovend. Ik zal mien best in ieder geval doen! Dat ik stappe aanst mit groot genoegen in de auto en dan gao k die kaant op.
  Henk Veenstra (gien femilie) maekt veur ZuidOostZorg 64 zwarfgedichten. Viere dr van bin in et Stellingwarfs. Iene van die viere is mien gedicht De Es uut de bundel Longerlaand.


19 feberwaori 17.00 Vleden zaoterdagmorgen, vlak veur de fanmiddag in Berkoop, kwam de rouwkaorte van Trijntje Jacoba (Tiny) de Boer-Visser over de post. Oolde kunde Ze is 86 jaor wodden. Vandemorgen bin k naor de ofscheidsdienst west in de Nicolaaskarke van Nijhooltpae. Et was een katteliek/protestaanse dienst. Ik hadde zoks nog nooit eerder mitmaekt. Dr was ok een soortement veurzanger, die de hieltied as dr zongen wodden kon veurin de karke staon gong, mit iene aarm de maote angaf en hadde-op mitzong. Zoks hak ok nog nooit mitmaekt. En ik bin in mien leven toch al naor hiel wat begraffenissen west Nao de dienst was de begraffenis op et karkhof. Daornao was et kondeleren in uutveertcentrum Nanninga in Wolvege. Dit was de eerste begraffenis van dit jaor Bleef et hier mar bij
  Vandemiddag hek netuurlik naor de Olympische vuuf kilemeter hadrieden van de vrouwluden keken. Niks zal mij ontkommen! Gien goold vandaege, mar wel twie medallies. Ireen Wst (zulver) en Carien Kleibeuker (broons). Hieronder Ireen Wst, die now iene goolden en drie zulveren medallies bij mekeer reden het.


Naor de volgende bladziede - Naor de veurige bladziede