24 feberwaori – 18.20 – Omda’k vandemiddag toch in Liwwadden was en omda’k sund niet al te lange tied een passien van de makro hebbe, he’k mar es in die winkel keken. Wat een joekel van een winkel! En… ik hebbe van alles kocht!
  De Olympische Winterspeulen bin veurbi’j en dat vien ik zuver spietig. Wat he’k d’r een mooie uren an beleefd! En wat hewwe et meraokelse goed daon! Dit beleven we nooit weer! Doe daor mar es daenken omme! Mit mekeer 24 medallies! Achte van goold, zeuven van zulver en negen van broons! We bin zodoende op nommer vufe in et klassement uutkommen. Ruslaand, Noorwegen, Kannede, Verienigde Staoten, Nederlaand… Halverwege de Speulen kree’k een mailtien van mien dagboeklezeresse Anneke uut Zwitserlaand. Zi’j is daor mit een Zwitser trouwd en mailde me enthousiast over goolden Zwitserse medallies. En doe he’k heur weerommemaild dawwe et van Zwitserlaand winnen zollen. Zo overmoedig duste ’k wel te wezen. En… we bin Zwitserlaand flink veur bleven. Dat laand staot nao Duutslaand op nommer zeuven in et klassement. Dat is ok best goed, mar toch… Et liekt me aanders best drege aj’ in dit soort tieden een Zwitserse man hebben, want veur wie moej’ dan juichen? Veur beide lanen? En wodt zoe’n man dan ok kribbig aj’ veur Oranje juichen? Ik hope dat Anneke en Gerhard de Winterspeulen zonder kleerscheuren deurkommen binnen! Misschien bin zi’j wel bliede dat et veurbi’j is!

23 feberwaori – 17.00 – Gisteraovend he’k in Hollaanseveld in ’t Anker verhaelen verteld veur een groep senioren. Die weren eerst te zette west op een stamppotbuffet en doe kregen ze mi’j d’r overhenne! Zoks moet toch heerlik wezen! Doe ’k daor om kwat over zeuven de deure inkwam reuk et naor… stamppot! Behalven de orgenisaosie kende gieniene me. Ze wussen allienig dat d’r een man kommen zol, mar ze wussen niet wie en ok niet wat die man doen zol. En doe kwam d’r dus een schriever/verteller uut de Stellingwarven daor ze nog nooit van heurd hadden. Ik mos dus extra mien best doen. Bi’j et eerste verhael kwammen d’r mar kwaolik reakties. Dan wee’k da’k alle zeilen bi’jzetten moet om ze te ‘veroveren’. Zoks lokt haost altied, soms wodt et een fiasko… Gisteraovend lokte et me prima. Et wodde een prachtige aovend!
  Vandemorgen kwammen Attie en Jelke nog even langes mit een boeket bloemen van de Stellingwarver Schrieversronte. Attie hadde et vleden weke vergeten en kom op mien fanmiddag in Berkoop. Ik vien de bloemen d’r lieke mooi omme! Dit boeket is stokken mooier as die aemele bossies bloemen, die de medalliewinners op ’e Olympische Winterspeulen kregen.
  Hieronder vier geweldige vrouwluden, die gister in Sotsji veur de 24ste en laeste Nederlaanse medallie zorgden. Goold bi’j de ploege-aachtervolging veur Marit Leenstra, Jorien ter Mors, Lotte van Beek en Ireen Wüst!


Naor de volgende bladziede - Naor de veurige bladziede