2 meert – 17.00 – An et aende van 2013 verscheen bi’j de Stellingwarver Schrieversronte et boek ’t Is genoeg west van Lies Boersma. Dat is trouwens een schoelnaeme. Ze het et boek in et Nederlaans schreven, Sjoukje Oosterloo het et in et Stellingwarfs vertaeld. Et is een vlot leesber boek wodden. Ik hadde et in een dag uut. Ie goezen d’r zomar deurhenne. Lies Boersma is een vrouw van halverwege de zeuventig en dit is heur eerste (en laeste?) boek. Dat neem ik temeensen an. En dan een autobiografische roman… Dat is nogal wat. In de huusholing daor ze groot in wodde was et geleuf van groot belang. Ze wodde kraomverzorgster, trouwde en kreeg kiender. Mar heur man bleef heur niet trouw, hi’j scharrelde mit een aander vrommes omme. Vandaor dat ze bi’j him weggong. Dat is spietig genoeg niks biezunders. Et overkomt honderdduzenden vrouwluden. Aj’ daor een autobiografische roman over schrieven willen… Is dat gegeven op himzels niet te maeger? Hoe moej’ dat dan literair anpakken? En wat vertel ie? As schriever moej’ alles durven te vertellen. Mar aj’ op die leeftied binnen en veur de eerste keer een boek schrieven… Ik bin d’r wel haost wisse van dat Lies Boersma lange niet alles verteld het. Dat ze de malste dingen vermoedelik verzwegen het. Misschien het ze vunnen dat de kiender alles niet hoefden te weten. En vremden al hielemaole niet! Dat is oe zo begriepelik, mar een schriever heurt aenlik niet zo te riddeneren. Aj’ een autobiografische roman schrieven willen, zuj’ mit et waeter veur de dokter moeten! Mit de billen bloot! Dat is griezelig, mar et moet wel! Al lezende in dit boek docht ik hiel lange van: zol d’r ok nog es wat gebeuren? En… op et aende gebeurde d’r gelokkig nog wel wat.
  Ik bin over et algemien gien groot liefhebber van aktiefilms waorin ze mekeer al schietende as wilden in auto’s naozitten en een hiele stad op ’e kop zetten. Mar… ik maeke graeg een uutzundering veur de Jason Bourne-films. Ik hebbe gisteraovend dus geneuten van The bourne supremacy. Hieronder Matt Damon as Jason Bourne.


1 meert – 17.00 – De laeste daegen bin ’k drok an ’t rippeteren mit verhaelen die ’k aanders niet zo vaeke vertelle. En dat allegeer veur de optredens van ankem weke. Ik mag dan drie keer de diek uut te vertellen. Ik zal naor Stienwiekerwoold, St. Jehannesge en Stienwiek.
  Topfotografe Anke, die hier in huus de boel ok schonehoolt, het poes Boris al speulende op petret zet en dat is neffens mi’j meraokels goed lokt. Dat vint Boris zels ok, dat die overweegt now om fotomedel te wodden. En a’k echt eerlik bin, vien ik zoe’n stevige, rooie kaeter aorig mooier as die wereldberoemde fotomedellen daor gien grieseltien vet te vule an zit. Vul de naemen mar in… Kun Naomi Campbell , Heidi Klum, Cindy Crawford en Doutzen Kroes hier tegenop? Ik docht et niet!


Noar de volgende bladziede - Naor de veurige bladziede