4 november – 17.00 – Gisteraovend he’k Roelien en Twan op vesite had. Lekker uut eten gaon was d’r niet bi’j, mar dit was ok gezellig. We hebben now weer even hielemaole bi’jpraoten kund.
  Vandaege he’k in klad een kollum schreven en ik hebbe een stokkien schreven veur de website van de JVS. En zo now en dan lees ik een verhael uut Op klompen troch de dessa, et ni’je boek van Hylke Speerstra.. Ik hadde gister de traonen in de ogen staon, zo greep een bepaold verhael me an. Wat een prachtig boek!
  Hieronder nog een foto die ’k zundagmiddag tiedens et jazzkonsert in Almelo maekt hebbe. The Hot Dogs in aktie!


3 november – 16.00 – Ik was gisteraovend eerst vlak veur middernaacht weer thuus vanuut Almelo. Ik hebbe daor gistermiddag geneuten van een prachtig jazzkonsert. Behalven de band van kammeraod Johan Bijkerk speulde zien vroegere band The Hot Dogs daor ok en d’r weren daansdimmestraosies, een Antilliaanse rapper en ik moch dus een verhael vertellen. Dat lokte goed. Ik zag Max van Rechteren Limpurg smaekelik zitten te lachen. Zoas gebrukelik zat die grafelike femilie op ’e veurste riegel, dat daor ha’k et zicht dus op. Nao et konsert is een klein gezelschop mit naor et huus van Johan en Gertie gaon. Daor kregen de aanderen eerst een groot stok gebak en laeter een heerlike waarme maoltied veurschotteld en ik zat op drie beschuten mit een schrabbegien botter en wat dunne sniffelties geitekeze te kauwen… Zoks is dus echt hatstikke vervelend en aekelik. Dan heur ie d’r (weer) niet goed bi’j. Nao et eten hewwe allemaole een grote hoed opzet, Johan is aachter de piano zitten gaon en we hebben mit mekeer langdurig lieden zongen. Van Island in the sun naor Lili Marleen en van Ik zou wel eens willen weten naor et prachtige Danny Boy. Dat lietien ontroert me altied weer.
Oh Danny Boy, the pipes, the pipes are calling
From glen to glen, and down the mountain side
The summer’s gone, and all the flowers are dying…
En doe het Grietje Bouma stiekem een foto van me maekt en die naor me toemaild. Now ja, toe dan mar…


Naor de volgende bladziede - Naor de veurige bladziede