6 november 16.30 Gisteraovend hek veur de eerste keer sund vleden zaoterdag weer wat waarm eten had en dat is beheurlik goed gaon. Hopelik is et slimste gedoe now weer veurbij. Ik zal ankem weke trouwens naor de internist, mar dat was al ofpraot. Ik hebbe vandaege nog een kollum in klad schreven. Ik zal ze ien disser daegen even naokieken en nog wat bewarken. Vandemiddag hek mien jaorlikse griepspuite had. Ik kenne iene die daor laestdaegs hatstikke ziek van wodden is. Die kreeg dus griep en kon de aarm zowat een weke niet bruken om typen te kunnen. Ik kriege zeker al meer as dattig jaor een griepspuite en hebbe dr nog nooit ok mar iene tel last van had. Daor hoop en reken ik now ok op! In de supermark trof ik een man die tegen me zee dak altied krek zo kommercieel west moeten hadde as de Friese schriever Hylke Speerstra. Mar ja, et liekt me now te laete en gooi et roer hielemaole omme, dat ik krabbele nog mar wat op mien eigen meniere deur.

5 november 16.20 De Stichting Nederlaanse Dialekten hoolt op zaoterdag 15 november de negende streektaelkonfereensie. Van t jaor wodt die dag in de biebeltheek van Hoogevene hullen. Anmelden kuj je bij et Huus van de Taol in Beilen. Zie hieronder.


Ik vernam van Abel Darwinkel dat dr eins nog wat te min vlocht op e kooi is. Kom op, volk! Niet zo lauw! Net stinne, hinne, zee Roel Oostra vroeger altied in zien theaterrebriek op Omroep Frieslaand. Veur meensken die streektael belangriek vienen is dr een prachtig pergramme saemensteld. Dat ik zol zeggen: geef jim op, gao op 12 november naor Hoogevene, en geniet van een mooie dag! Verwen jezels! Naor de Ikea kan altied nog, die blift dr wel!

Naor de volgende bladziede - Naor de veurige bladziede