10 november – 16.30 – Ik droomde vannaacht dawwe argens in Hollaand woonden en dawwe mien oolde huus as vekaansiehuus bruukten. We weren d’r krek een dag of wat west en mossen weer op huus an. Ik leup mankeliek et huus nog es deur en over et hiem henne. Doe reden we vot. Bi’j et huus, daor a’k now in warkelikhied wone, zag ik een peer kiender bi’j de deure ommedangelen…
  Vandemiddag mo’k naor mien internist in et ziekenhuus van Et Vene veur oonze jaorlikse ofspraoke. In beginsel moe’k vandaege over een jaor weer kommen, mar omdat et op et ogenblik allemaole niet gaot zoas et gaon moeten zol, moe’k et even in de gaten holen en eventueel in jannewaori weerommekommen. Zoas altied is d’r ok bloed prikt.

9 november – 17.00 – Even over gisteraovend… Ik schrok me om ongeveer zeuven ure dood. Ik zat veur de komputer en inienend kwam d’r een waorschouwing van de pelisie en et eupenbaor ministerie mit een foto van Willem-Alexander op et scharm. Mien komputer was deur de pelisie onklaor maekt veur gebruuk, ston d’r in et bericht. En dat was ok zo, ik kon d’r hielemaole niks meer mit beginnen. Ik hadde neffens et bericht de meerst verschrikkelike dingen uutspoekt: meensken benaodield, oneerlik west, kienderporno verhaandeld… En nog vule meer. Ik riskeerde een gevangenisstraf van drie tot vuuf jaor. Of… ik mos op een bepaolde meniere binnen et ure honderd euro betaelen. Dat is vanzels niet vule aj’t vergelieken mit die gevangenisstraf. Now ja, et was wel dudelik da’k troffen was deur een virus. Dat ik bin mit de komputer in de auto stapt en naor Jan de webmaster in Et Vene reden. Et bleek dat een virus een pat van et antivirus-pergramme uutschaekeld hadde. Nao aanderhalf ure dee de boel et weer. Mar ja, doe mo’k thuus alle draodeboel zels weer aachterin de komputer zien te kriegen. Ik hadde, veurda’k votgong, op een stok pepier uuttekend waor welk stekkertien en draotien in mos. Dat ikke an ’t prutsen, mar de boel dee et niet. Doe kwam d’r een ingewikkeld tillefoongesprek mit webmaster Jan wat me haost wanhopig maekte. Hi’j hadde et over een blauwe draod die van een kassien mit drie lochies naor et wifi-kassien gong en dan gong d’r een grieze draod van et wifi-kassien naor de komputer. Misschien dat de kleuren ok wel krek even aanders weren. En die draod ha’k vermoedelik vergeten in de komputer te doen. En dat was ok zo… En doe dee alles et weer. Verschrikkelik! Laeter docht ik an dat schetsien van Henk Elsink, die as Bakema boven in Grunningen iene instrukties geft hoe hi’j een bom onschaedelik maeken moet en angeft welke kleur draod die man deurknippen moet. Was et zo niet ongeveer? Now, dat tillefoongesprek tussen Jan de webmaster en mi’j was ok eerste klasse kabberet.
  Vandemorgen he’k naor Et Vene west veur de verjaordag van Jacob. Die was gister jaorig en viert et vandaege. Die is now dus ok al weer een jaortien oolder! Hieronder een foto van vandemorgen. Aj’ bi’j Haarm en Jacob deur de raemen kieken, ziej’ dit. In zoe’n sjieke wiek wonen die beide manluden!


Naor de volgende bladziede - Naor de veurige bladziede