20 november 18.00 Vandemiddag hek veur een groep oolderen verhaelen verteld in dienstecentrum De Holdert in Drachten. Ik was daor in 2004, 2008 en 2012 ok al west te vertellen. Dat ik bin dr haost mit an wak dan nog vertellen moet. Zovule verhaelen ken ik now ok weer niet uut et heufd. Dat et is vandemiddag een mingelmoesien wodden. Verhaelen die k daor nog niet eerder verteld hadde en wat verhaelen die k daor tien jaor leden ok al es vertelde. Ik beginne me meer en meer en soort Ronnie Tober te vulen, die mit oolde suksessen et pad uut is. Onderwegens hek bij uutgeverije Bornmeer op e Gediek nog wat boeken weghaeld.

19 november 16.00 Gisteraovend zee ien van de nije inkommelingen in et gemientehuus tegen me dat hij docht dak aachter in de zeuventig was. Zoks is vanzels gruwelik, ik hebbe dr wel goed omme slaopen, mar toch Dat ik bin vandemorgen drekt naor Bertha in Et Vene gaon. Die het me et haor bekubbed en dr wat kleurversteviger indrokt. Disse behaandeling moet toch zeker tien jaor in mien veurdiel warken! Ik hebbe gisteraovend trouwens nogal wat Nijntje-boekies in et Stellingwarfs verkocht. Pake en beppe pluus is vanzels een mooi sunderklaoskedogien. Een idee veur jim? Et is in de boekhaandel te koop, bij de Stellingwarver Schrieversronte in Berkoop, en ik kan et jim ok toesturen of (in de buurt) an huus bezorgen! Stuur mar een mailtien, dan komt et roem veur 5 december klaor!
  Gister kreek een peer kiender van de overburen an de deure. Ze hadden post (een kaorte) veur me midden op e weg vunnen Sund vandeweke komt dr iene op een scooter langes om de post rond te brengen. As dat mar goed gaot Et begin belooft niet vule goeds op disse meniere.

Naor de volgende bladziede - Naor de veurige bladziede