22 november 17.30 Om et middagure henne wak in et krematorium van Ooldeschoot veur de ofscheidsplechtighied (in et Stellingwarfs) van Bram Hankel. Bram en Duuk kwammen as pas trouwd stel in 1953 naost oons te wonen. Ik was doe een joongien van krek zeuven jaor en Bram een jonge kerel van 27. Ik zie him zo nog veur me. Aovens nao zien wark slichtte hij een stok wal an de westkaant van heur huus tegen oons laand an. Duuk ston dr dan vaeke bij te kieken. En now is Bram dr niet meer. Hij is 88 jaor wodden. De tied ontscht oons Veur dawwe dr arg in hebben is et oonze tied.
  Nao de plechtighied bin k naor Jan de webmaster gaon. Hij en een beroepsfotograaf hebben nog even naor mien nije fototoestel keken. Jan miende dat dr nog wat an veraanderd wodden mos, mar et is allemaole prima zo. Ik kan dr zels mit filmen, mar daor zie k nut en noodzaeke (nog) niet echt van in.
  En dan nog even over gisteraovend. Et Drentse super-duo Harm en Roelof hebben oons en een zael vol volk trakteerd op een prachtige veurstelling van heur nije kabberetpergramme. Et was mooi en hilarisch. Wat hewwe geneuten! Ankem veurjaor kommen de beide manluden op e Fochtel en dan gaowe mit mekeer weer henne! Hieronder nog een foto van gisteraovend nao de vergeerdering en veur et eten. Pieter, Fettje en Jelle, drie van de vier voogden van de JVS.


21 november 15.50 Vandemorgen hek een bestelling van een stokmennig Stellingwarver Nijntje-boekies Pake en beppe pluus naor De Oosterstreek brocht en vandemiddag het Anke et huus schonemaekt.
  En now kriek over tien menuten vesite in een schoon huus. De overige bestuursleden (voogden) van de Johan Veenstra Stichting kommen hier en dan hewwe oonze wintervergeerdering. Nao de vergeerdering eten we hier. We kriegen gratineerde eerpelties, grune boonties, stoofpeerties, zute appelties en een runder slavinke. En dan is dr nog bitterkoekies- en chipolatapudding. Nao et eten hoop ik dat de vesite ofwaskt en dan gaowe mit n vierend naor oons mfc De Nije Stienze veur een veurstelling van et beroemde en utermaote populaire Drentse kabberetduo Harm en Roelof. Die kommen hier mit prachtige lieties en schetsies. Een protte humor en gelokkig niet plat. Gien onderbroekelol, mar humor op nivo! Die beide kerels bin echt geweldig goed. Fettje en ik gaon aanders ieder jaor naor een optreden van heur in Gasselte, mar vanaovend hewwe et dichte bij huus!
  Hieronder: de karke van Berkoop op een koolde haastmorgen.


Naor de volgende bladziede - Naor de veurige bladziede