2 december – 16.00 – Zo now en dan kiek ik een stokkien nao van de drokproeven van mien ni’je roman Een vrouw van ivoor. Vandemorgen ok. Et het allegeer gien haost, et boek verschient pas in augustus ankem jaor.
  Et Rieksmuseum in Amsterdam het me toestemming geven om een schilderi’je uut heur kollektie te bruken veur et maeken van vellegies persoonlike postzegels deur postnl. Ze hebben me een prachtige ofbeelding toestuurd, omdat ze graeg de beste kwaliteit willen. Et wo’n postzegels mit et petret van Maria Louise van Hessen-Kassel (1688-1765). Ze was de vrouw van de Friese stadhoolder Johan Willem Friso en wodde deur et volk Marijke Meu nuumd omdat ze slim populair was. Et is op 9 april 250 jaor leden dat ze wegraekte en daor wodt in Frieslaand een protte ommedaenken an geven. Op die dag begint in de Grote of Jacobijner karke in Liwwadden mit een grote bi’jienkomst et Maria Louise-jaor. Ik was eerst van doel en laot de postzegels ankem jaor eerst maeken, mar et kan now nog veur de oolde pries. Op 1 jannewaori wo’n de postzegels neffens mi’j weer duurder. Hieronder een ofbeelding van et petret uut et Rieksmuseum dat op ’e postzegels komt. Maria Louise wodde indertied schilderd deur Johan Philipp Berr.


1 december – 17.00 – Vandemiddag he’k de niet verkochte boeken van de Wintermark in Mildam weerommebrocht naor de Stellingwarver Schrieversronte in Berkoop. En vandaor bin ’k deurreden naor et Huus van de Taol in Beilen om wat Drentse kedogies te kopen. Ik was daor nog nooit west en hebbe de boel goed bekeken. Jan Germs het me rondleided en ik hebbe een bakkien thee mit him mitdronken. Mar ik hebbe ze niet te lange van et wark hullen, et Drents moet vanzels niet te lieden hebben van de vesite van een Stellingwarver schriever.
  Hieronder nog een foto van gister. An et begin van de Mauermittag in Veenwoolden zong zanger Bennie Huisman et bekende lied van Joseph Schmidt Ein Lied geht um die Welt.


Naor de volgende bladziede - Naor de veurige bladziede