4 december 17.30 Naodat de Liwwadder Kraante stopt was mit de Stellingwarver rebriek Uut de pultrum van de Stellingwarven, kwam de rebriek Klunderen. Karst Berkenbosch en ik schreven omstebeurten kollums veur die rebriek. Laeter, doe Karst dr mit ophullen was, dee k dat allienig. Op 24 feberwaori 2001 ston mien eerste kollum in die rebriek. Vandaege hek mien 250ste kollum naor de kraante maild. Toch wel een biezunder mement!
  Vandemiddag hek op vesite west bij Wies in Heerenhage in Et Vene. Dat hak aenlik al lange es eerder doen moeten, mar ja... Ik de peer weken dak now gien optredens hebbe, perbeer ik beloften nao te kommen en wat bij verschillende meensken op vesite te gaon. Allegeer meensken die niet meer bij mij kommen kunnen. Ik daenke wel es: as ik laeter nargens meer kommen kan, zollen dr dan nog meensken bij mij kommen? Wies zee wel drie keer dak zokke mooie hanen hebbe en ze zee dak mit de dag knapper wor. En dat miende ze. Mar ik wete niet wak daor mit moet, want aanders zegt nooit iene dat. Nao de vesite an Wies hek argens nog wat bestelde Maria Louise-postzegelvellegies vlakbij Heerenhage anbrocht. Dan hoeven die meensken gien port te betaelen. Wat een service! Doe k krek thuus was belde dr een man uut et Braobaanse Veldhoven mit de vraoge as hij nog wel vier Maria Louise-vellegies kriegen kon. Ik hadde him ok al twieje stuurd

3 december 16.20 Twie weken leden lag dr post veur mij midden op e straote veur mien huus. Gister is al mien post bij de buren bezorgd. Mien hemel nog an toe
  Ik hebbe et boekien Waar een wil is, is een weg van Riek Bergsma lezen. Riek is de beheerder van oons mfc De Nije Stienze en hij het twie boekies over zien leven schreven. Et eerste gaot over zien jeugdjaoren, dit boekien gaot over zien leven as boer in Nijhooltpae. Mooi om te lezen!
  En dit is dan et vellegien postzegels mit et petret van Maria Louise van Hessen-Kassel (Marijke Meu) dr op. Mit daank an et Rieksmuseum in Amsterdam! Ik hadde al verschillende bestellings veur dit vellegien, dat die bin k now an et versturen. Wie ok zoen vellegien hebben wil, kan kontakt mit me opnemen. Et kost 7,50 plus verzendkosten.


Naor de volgende bladziede - Naor de veurige bladziede