6 december – 17.00 – Vandemiddag he’k op vesite west bi’j Antje en Dick in Zwolle. Dat mos ok al langes es een keer, mar et is now gebeurd en et was genoeglik.
  Ik bin wat oolde ansichtkaorten an ’t scannen veur een man uut De Kniepe die ze speert en daor a’k vleden weke op ’e Wintermark in Mildam mit in de kunde kwam. Hieronder een mooi oold prentien van mien eigen dörp Ni’jhooltpae. Ik schatte zo dat disse foto ongeveer zestig jaor oold is. Wie zol de vrouw veur de winkel van ome Its Siegersma en tante Jaanke wezen?


5 december – 16.00 – Et bestuur van de Stichting Nobilis het unaniem besleuten om mi’j in heur bestuur te vraogen. Dat is een grote ere en ik hebbe ja tegen et verzuuk zegd. Ik neme et plak in van grafikus Peter Lazarov. Hi’j woont niet meer in Nederlaand, mar de helte van et jaor in Bulgeri’je en de ere helte in China. En dan is et wat drege en blief in et bestuur van Nobilis zitten. De Stichting Nobilis het een schoffien leden de oolde schoele van De Fochtel in gebruuk neumen as Centrum veur Prentkeunst. Et gebouw wodt op 31 jannewaori officieel eupend.
  Vandemorgen he’k keramist en kammeraod Peter Hiemstra uut Berkoop op koffievesite had. Et wodde hoog tied dawwe weer es bi’jpraoten konnen en dat hewwe dus daon. Hi’j het me vraogd veur een mooi en biezunder projekt, mar daor vertel ik laeter wel es over. En ik kreeg van him et mooie boek Significant Others dat heurt bi’j de tentoonstelling over mannen en vrouwen uit de omgeving van Francis Kilian en Peter Hiemstra.

Naor de volgende bladziede - Naor de veurige bladziede