14 december 17.40 Wat een schrik gisteraovend! En wat bin ik een allemachtige domkop! We leupen gistermiddag tegen vier ure, nao de ruildag in Doetinchem, van et Stadsmuseum naor de parkeergerage bij de schouwburg. Jan van Koolwijk, Pieter en ikke. Pieter hadde meerdere kofferties mit ruilmateriaol bij him die hij op een stikkarregien vervoerde. Ik dreug twie tassen van mezels en ok nog een tasse en een koffertien van Pieter. En doe zag ik dat ien van de veters van mien schoenen los zat. Ik bleef bij een baankien staon, zette tassen en koffertien daor daele en maekte de veter weer vaaste. Jan en Pieter weren deurlopen, dat ikke doe vlogge aachter heur an. Mar haostige spoed is zelden goedDoe we meer as aanderhalf ure laeter in Nijhooltpae bij mij veur t huus uut de auto stapten ontdekte Pieter dat et koffertien, dat ik mitnemen zol, niet in de auto ston. Wat een schrik! Waor zol dat bleven wezen? We hadden al rap deur dak et vermoedelik op dat baankien staon laoten hadde. Een koffertien mit een vracht an kostbere prenten! Wat vuulde ik me ellendig! As et now van mezels west was, mar et was van Pieter! We hebben drekt Henk Weltje in Doetinchen beld mit de vraoge as hij bij dat baankien kieken wol. En ok al was et gister de dattiende, et koffertien ston dr nog! Wat weren wij bliede! Henk stuurt et koffertien over de post naor Pieter en disse stomme koehaffel betaelt de verzendkosten!
  Op 16 jannewaori mak optreden veur de leden van et shantykoor Stuyvesant Sailors en heur anhang. Ze vunnen dak veur die tied eins es naor heur kommen mos te luusteren en dat hek vandemiddag daon. Ik hebbe in de Wolvegester Franciscuskarke et kastkonsert van et shantykoor bijwoond. Prachtig! De karke zat stampvol. En de roomse heiligen op e braandschilderde raemen hoefden heur niet te argeren an vassies over wilde zeeluden, draank, en aeventuurlike vrouwluden. Ze konnen mit de meensken in de karke genieten van mooie kastlieden!

13 december 18.40 Gister kwam dr een kastpakket over de post veur de postaktiven van de belastingdienst. As daank veur al mien zegenrieke wark van eertieds!
  Vandemorgen bin k om half negen bij Pieter in de auto stapt en doe biwwe naor Doetinchem reden. Daor was in et Stadsmuseum de ruildag van Grafiekwereld. In et vervolg is die december-ruildag trouwens in et Centrum veur Prentkeunst op e Fochtel! In et Doetinchemse Stadsmuseum hewwe mitien ok de exlibris-tentoonstelling De cirkelgang van leven en dood bekeken. Hiel arg mooi! Hieronder: de laeste ruilders blieven nog even plakken.


Naor de volgende bladziede - Naor de veurige bladziede