16 december 16.00 Ik kriege zodaolik volk over de heerd. Jan en Klasien kommen hier op vesite en ze blieven ok te eten. Klasien komt van Nijhooltpae en ze het al een hiele riegel Stellingwarver boeken inlezen in de studio van de bliendebiebeltheek in Sneek. Jan komt van Donkerbroek en was veearts. Et bin Stellingwarvers in de vremde, want ze wonen in Ooldege bij Drachten. Ik hebbe vanzels eten toemaekt dak zels ok verdregen kan. Gruuntesop mit ballegies en een hopelik lekkere ovendschottel mit wat kwark nao. Uut eten gaon is dr veur mij op et ogenblik niet bij. Ik bin dr bange veur dat et gekwakkel langdurig wezen zal.
  Hieronder nog een mooie anweenst veur mien grafiekverzaemeling. Dit moois hek vleden zaoterdag ok uut Doetinchem mit wegneumen naor huus toe. Een prente van Ruslan Agirba uut Oekrane. Et beeldet et sprokien van et goolden haentien uut.


15 december 16.20 Ik hebbe een kollum schreven over Chantal Janzen. Och ja, een meenske dot wel es wat Ik hebbe vandemorgen een vracht bosschoppen in huus haeld en vandemiddag alvast een flut eten toemaekt, want morgenaovend kommen dr eters.
  Hieronder een anweenst veur mien grafiekverzaemeling daor ak zaoterdag in Doetinchem an kommen bin. Een prachtige ets van de grafikus Vladimir Stutinsky uut Oekrane. Ik bin dr slim wies mit.


Naor de volgende bladziede - Naor de veurige bladziede