20 december Ė 16.20 Ė Vanaovend is et Anbo-kastdiner in resteraant Brinkzicht in Vledder. Vleden jaor biwwe daor mit een bus vol meensken henne west en dat was vreselik gezellig. Mar ja, ik durve daor now niet an mit te doen. Dat is slim vervelend!
  Vandemiddag heík even naor postzegelwinkel Feddema in Drachten west om een niíj album en wat mooie postzegels te kopen. Aík niet mit uut eten kan, laoík mezels dan op disse meniere mar wat verwennen. Onderwegens heík mien Q8 speerkaorte verzulverd, omdat ze vanof 1 jannewaori mit die speerkaorten opholen.
  Doe ík weer thuus was biník drekt naor Sickengeoord in Wolvege reden om de femilie te kondeleren mit et wegraeken van neve Bart. Et kondeleren is eins morgenaovend, mar femilie die dan niet kommen kan, kon vandemiddag langeskommen. Dat was goed. Dír weren ok kiender van neve Jaap. Zo ziejí mekeer nog es. Ik bin bliede daík dír west hebbe.
  Ik hebbe et boek Favoriete kattenverhalen lezen. Lesley OíMara het de mooiste verhaelen over katten indertied verzaemeld en die bin in een boek uutgeven. Et is een prachtig boek, dat al in 1993 in een Nederlaanse vertaeling uutgeven wodde. Wondermooie verhaelen van Doris Lessing, Lewis Carroll, W.L. Alden en een hieleboel aandere bekende schrievers. Netuurlik ontbrekt De gelaarsde kat van Charles Perrault niet in dit boek! Ik neme et morgen mit veur Douwe, die is ok gek op katten en katteverhaelen. Die zal dit grif ok mit groot genoegen lezen. En ik zie Douwe morgen toch, want we moeín mit aandere verhaelevertelders optreden tiedens de MidwinterjŻn in Franeker. Hieronder past vanzels allienig mar een foto van Boris en Joris, mien beide biesterbaorlike lease-poezen! Joris beslikt breur Boris!


19 december Ė 17.00 Ė Vandemorgen heík naor de dokter west veur de jaorlikse kontrole op huudkankerplakkies. Hiíj het ien plakkien anstipt en veur de rest zag et dír wel goed uut. In et verleden is dír al drie keer een plakkien weghaeld, dat et is vanzels een goed ding dat zoks riegelmaotig bekeken wodt.
  Ik gao vanaovend weer vot te vertellen. In de Hoolten Klinte in Appelsche maík vertellen veur een groep sjefeurs van een taxibedrief mit heur partners. Ik hoeve dír eerst om negen ure te wezen, ze gaon eerst mit mekeer eten. Ik bin een soortement naospieze.
  Vandaege kwam de rouwbrief van mien neve Bart Krol. Hiíj is 81 jaor wodden. Zien vrouw Pietje raekte disse zoemer weg. Al mien neven en nichten van mien moeder heur kaant bin dír now niet meer. Ik bin dír allienig nog van over. En gelokkig is Fokje dír nog, de vrouw van neve Sipke Siegersma. Alles raekt weg, lost op in de tied. Dat is een sombere gedaachte tiedens disse regenachtige, donkere daegen an et aende van et jaor. Hieronder een schoelefoto van mien neven Jaap en Bart Krol. Et leven was doe nog mar krek begonnenÖ


Naor de volgende bladziede - Naor de veurige bladziede