24 december – 16.20 – Ik kreeg alderhaande reakties op mien kollun Veertig in de Liwwadder Kraante van gister. D’r was zels een man die d’r over droomd hadde! Et moet ok niet malder wodden!
  Vandemorgen bin ’k om tien veur tiene in Wolvege op ’e trein naor Grunningen stapt. Daor he’k in et Grunninger Museum de tentoonstelling Het geheim van Dresden – Van Rembrandt tot Canaletto – bekeken. Een tentoonstelling van de Staatliche Kunstsammlungen Dresden en et Grunninger Museum. Rembrandt, Titiaan, Velasquez, Van Dyck, Canaletto… In Grunningen is al dat moois te bekieken. En dat kan allemaole deur de beide Saksische keurvosten August de Starke en zien zeune August III, die behalvan keurvost van Saksen ok keuning van Polen weren. Zi’j hebben indertied, deur de jaoren henne, ien van de belangriekste Europese keunstverzaemelings bi’j mekaander gadderd. Gao al dat moois bekieken! Et is meer as de muuite weerd! Keuninginne Máxima eupende de tentoonstelling op 12 december. Onderstaonde foto van Vincent Jannink staot op ’e website van et Keuninklik Huus. Máxima bekikt hier ien van de eerste schilderi’jen van de tentoonstelling: een gezicht op Dresden.


23 december – 16.20 – Vandaege he’k as een soortement kastman kedogies rondbrocht. Lekkers veur Jan de webmaster veur alle technische bi’jstaand en Fokje veur alle lekkere eten!
  Now moej’m es even goed naor de foto hieronder kieken. In die prachtige selon van et Franeker planetarium daor ik zaoterdagaovend verhaelen vertellen moch, ston een mooie kaaste mit een soort opzetstok d’r bovenop. En daor zag ik twie mooie griffioenen op staon. Dat bin Stellingwarver symbolen. Dat now zit ik vol vraogen. Hoe kommen ze in Franeker an een kaaste mit oonze griffioenen? Bin ze daor wel eerlik ankommen? Is dit lichtkaans oorlogsroofgoed? Ik hebbe wel es van een zekere Grote Pier van Kimswerd heurd. Kimswerd ligt vlakbi’j Franeker… Et staot me zo bi´j dat de Friezen die man haost as een heilige vereren. Mar et het indertied vanzels een malle schobbejak west. Zol die aekelike gofferd van een Pier indertied misschien ok in de Stellingwarven west hebben en zol hi’j daor disse mooie kaaste mit oonze griffioenen steulen hebben? Wie kan dit uutzuken? En as mien veronderstellings waor blieken te wezen, moet die kaaste nao al die jaoren vanzels as de wiedeweergao an oons weerommegeven wodden!


Naor de volgende bladziede - Naor de veurige bladziede