28 december 16.00 Gister hek in de naomiddag twie uurties op jaordagsvesite bij Peter in Berkoop west. Hij is zestig jaor wodden! Tussen vier en acht ure kwammen dr gaasten langes. En Peter (akkordeon), Christiaan (gitaar) en Victor (zang) hebben oons vergaast op een mooi lied! Ze kommen zo now en dan bij mekeer om meziek te maeken!
  Ik hebbe mien buro es even goed opschoond. Dat moet ien keer in de zoveul jaor wel es een keer. Ik maeke zo now en dan wat antekenings op kladdegies waor ak lichtkaans ooit nog wat mit kan: een gedicht, verhael of kollum schrieven. Ik vun tussen alle pepiereboel wat antekenings uut 2007, daor ak wel een kollum over schrieven kunnen zol en dat hek now meer as zeuven jaor laeter daon! Die wat beweert, die wat het!
  Egbert en Rieke brochten hier laestdaegs wat deuzen mit oolde boeken. De Stellingwarver boeken hek naor de Schrieversronte brocht, Anke het een staepeltien mitneumen en ik hole dr zels ok een peer van. In de kommende weken mag vesite dr van alles uutzuken en mitnemen. Ik hebbe ien van de boeken, die k zels holen wil, drekt ok mar lezen. De verborgen bron van Hella S. Haasse. De eerste drok stamt al uut 1950, mar et is nog prachtig om te lezen. Jurjen Siebeling is wat over de toeren en gaot om op te knappen naor et onbewoonde laandgoed in Frankriek van zien vrouw Rina. En daor ontdekt hij van alles in oolde pepiereboel en wodt et him dudeliker waoromme as zien vrouw dot zoas ze dot en is zoas ze is. Now, dat zollen een protte kerels misschien wel graeg uutvienen willen! Hieronder een hooltgravure van Peter Lazarov uut mien grafiekverzaemeling. Peter maekte disse prente in 2008 en de gravure lat drie petretten van Hella S. Haasse zien!


27 december 16.00 Gisteraovend hak uut eten kund bij Van der Valk in Wolvege mit Roelien, Twan en Jan zien moeder, mar dat duste k vanzels niet an. Doe ze et eten op hadden, hebben ze mij beld. Dat doe bin k dr nog even hennereden en hek daor een koppien thee mitdronken. Zo kon k toch nog een klein betien mitdoen. Et gekwakkel duurt mar deur, mar ik moet et van de internist eerst mar es een vorrels jaor anzien
  Vandemorgen hek twie poezemaanties kocht veur Boris en Joris. Dat staot wat netter in de kaemer as dat dr twie oolde, bodpepieren deuzen staon. En now mar ofwaachten as de majesteiten dr in liggen willen. Boris het dr al even in legen, Joris nog niet De heren bin oe zo zinnig! Et bin wat dat anbelangt krek meensken!
  Gistermiddag hek een aentien kuierd. Bij de Scheene langes naor mien oolde huus toe. Ik hebbe dr ok mar een foto van maekt.


Naor de volgende bladziede - Naor de veurige bladziede