8 jannewaori 17.00 De laeste daegen hek mailkontakt mit grafikus Peter Lazarov in China. In de Chinese stad Chongqing is op 29 november zien zeune Victor geboren! Ik hebbe Peter vandaege vraogd en maek een nij exlibris veur me waor Boris en Joris op veurkommen. Die beide bingels bin belangriek in mien leven en verdienen et dat ze op een exlibris ofbeelded wodden! Ik hebbe fotos van Boris en Joris naor China stuurd. Welke katten overkomt dit? Ze hebben dr zels gien flauw idee van hoe beroemd as ze an t wodden binnen. Ze weten op dit mement niet iens dat dr een wereld bestaot. Boris ligt boven in een klein kaemertien in een oolde rookstoel en Joris ligt in de huuskaemer in zien poezemaantien. Hieronder een foto van Peter Lazarov in China waor hij de laeste maonden les geven het an studenten. An et aende van disse maond vligt hij weer naor Bulgerije en in april is hij weer (even) in Grunningen. Lichtkaans dak him dan weer zie.


7 jannewaori 16.30 Ik hebbe vandemiddag even naor Jan zien moeder in Wolvege west. Ze hadde nog een kedogien veur me in verbaand mit mien verjaordag van gister. Een prachtig blauw vest veur op e fiets en in de boot. Was et mar zoveer dak dat an kon! Ik bin dr slimme bliede mit! Ik hebbe trouwens een boel mooie kedogies kregen.Ok twie boeken: Wim Danils De taal achterna en KattenKwaad, de mooiste verhaelen over katten van verschillende schrievers zoas Rudy Kousbroek, Lennaert Nijgh, Hans Dorrestijn, Annie M.G. Schmidt en een hieleboel aanderen. Ooit zak alles lezen. Dr kwammen ok een boel tillefoonties, mailties en kaorten. Is disse niet mooi?


Naor de volgende bladziede - Naor de veurige bladziede