17 jannewaori – 16.20 – In december he’k naor et kastkonsert van shantykoor Stuyvesant Sailers in de roomse karke van Wolvege west. Doe he’k naor heur keken en luusterd. Gisteraovend keken en luusterden ze naor mi’j. Ik hebbe heerlik verteld op heur ni’jjaorsbi’jienkomst mit heur partners. Mit mekeer weren d’r zoe’n tachtig meensken in zaelecentrum Klijnsma in Wolvege. Nao mien optreden was d’r een buffet, daor a’k veurzichtig toch mar wat an mitdaon hebbe. Ik bin ok nog bleven om de diaveurstelling te bekieken van de prachtige reize van de Stuyvesant Sailers in 2014 naor Ierlaand. Mar doe om elf ure de afterparty mit live meziek van Oscar Palm begon en d’r daanst wodden kon, bin ’k rap votgaon. Want ik datzelde gebouw, dat indertied nog et Nutsgebouw hiette, het de femilie Douma mi’j in de zestiger jaoren et daansen perberen bi’j te brengen en dat is een grote mislokking wodden. Ik hebbe daor gien gevuul veur. Dat he’k gisteraovend vanzels ok verteld mit as gevolg dat drie vrouwluden me nao ofloop vreugen om mit heur te daansen… En dan moej’ maeken daj’ vot zien te kommen!
  De veuruutgaank is hier in huus niet tegen te holen. Gistermiddag het webmaster Jan me een webcam instelleerd op mien komputer. A’k now in et vervolg mit him an ’t skypen bin kuwwe mekeer ok zien. En ik kan jim ok zien as jim mit mi’j op die meniere bellen en ok zoe’n ding hebben. Ik wete vanzels dat van zoks een protte ellende kommen kan mit meer as pikaante filmpies op internet, mar ik bin niet van doel en vraog al bellende an meensken as ze de kleren veur me uuttrekken willen. Jim kun dus gerust mit mi’j skypen (skynaeme stiekelstokkies) en webcammen.

16 jannewaori – 17.00 – Ik hebbe gister vusen te vlogge bliede west. Ik hebbe sund gisteraovend weer vervelende, braanderige ogen. De huusdokter zee vleden weke dat et meer lastig as arg is. Mar zokke praoties hej’ niet zovule an. Mar weer minder lezen en zo… Vandaor da’k een kruukkoeke bakt hebbe en een peer potties sjem maekt hebbe. Ie moe’n toch wat…
  Ik doe mit an een Drents projekt beeldende keunst en literetuur. Ik kreeg in september vleden jaor et verzuuk een gedicht of prozatekst te schrieven bi’j beeldende keunst. Ik hebbe twie gedichten maekt bi’j een hooltgravure van Peter Lazarov. De exlibris Two on a boat die hi’j in 2012 veur me maekt het. Ik hebbe de boel gister verstuurd. Ze moe’n d’r in Drenthe mar een gedicht van uutzuken. Alle bi’jdregen kommen in een biezundere uutgifte van et Drents letterkundig tiedschrift Roet, dat op 21 juni prissenteerd wodt in galerie Wildevuur in Hooghalen. Butendat wodt van alle dielnemende inzendings een poster maekt en al die posters mit beeldende keunst en literetuur wo’n overal in Drenthe tentoonsteld. In ieder geval in galerie Wildevuur in Hooghalen, de hervormde karke van Anloo, werenhuus Van der Veen in Assen en et gemientehuus van Aa en Hunze in Gieten. Hieronder de hooltgravure Two on a boat. In et echt zicht de boot, daor we zoemers et waeter mit op gaon, d’r ietsien aanders uut en de beide manluden bin in warkelikhied ietsien oolder… Mar ik vien et nog altied een prachtige prente!


Naor de volgende bladziede - Naor de veurige bladziede