21 jannewaori 17.00 Naor anleiding van mien kollum Blue Monday in de kraante van gister mailde Susan me midden in de naacht dat ze me bewondert. Nooit eerder het een vrouw me dat midden in de naacht maild. Dak dit nog beleven mag!
  Dick van Niekerk het et interview dat hij mit me hullen het veur et tiedschrift Locomotie al hielemaole uutschreven en et me toemaild. Et is een mooi stok wodden. Ik hebbe een peer kleine oneffenheden ontdekt en him veursteld dat nog even te veraanderen. En dat zal gebeuren! Klaas Jager het zien gedichtecyklus Drieluik voor Jan Mankes hier en daor nog wat veraanderd en ik hebbe op mien beurt de vertaeling in et Stellingwarfs weer wat veraanderd. Now is dat ok weer klaor. 
  Vandemiddag hek even bij Jan zien moeder in Wolvege op vesite west en vanaovend gao k naor een aovend van de Anbo in oons mfc De Nije Stienze. As groot fan van Boer zuukt vrouw moet disse aovend me vanzels niet ontkommen, want Boer Jan (Ybema) en zien Paulien kommen om te vertellen over heur belevenissen van een jaormennig leden bij dat populaire tillevisiepergramme. Ik bin benijd! Hieronder een foto van Boer Jan.


20 jannewaori 17.00 Gister kwam dr een uutneudiging ak op zundag 29 meert mit mien boeken op e Lentemark in et drpshuus van Jonkerslaand staon wil. Ik hebbe me daor vandemorgen drekt veur opgeven! Aj as schriever in disse tied nog boeken verkopen willen, zuj je dr op alle meugelike menieren bijgeven moeten!
  Vandemiddag hek weer een aende kuierd. Van mien huus naor de Kuunder toe. Dat pad hak nog nooit lopen. Mit mekeer een vier kilemeter. Gister hek zes kilemeter lopen. Ik verneme wel dat al dat lopen goed veur de kondisie is.
  Een schoffien leden hek et boek Koninklijke minnaars en minnaressen van Lars Elgklou lezen. Een mooi en opzienbaorend boek! Keunings en preenzen trouwden vroeger niet uut liefde, mar ze sleuten poletieke huweliken. Mar hiel inkeld wodde et dan echte liefde. Haost altied was dat niet zo en nammen zokke manluden dr een maitresse of meerdere maitresses bij. Dat liekt me hiel begriepelik. Ik vun et altied wel een betien begrotelik veur die aarme, zielige preensessen die vanwege de poletiek mit zoen vremde kerel in meerst een vrend laand trouwen mossen. Mar zokke vrouwluden deden percies etzelde! Ik wodde dr zuver fleurig van doe k dat las. Leve de emancipaosie! Zokke vrouwluden vermaekten heur mit toy-boys. Een beroemd veurbeeld was de Russische tsarina Catharina de Grote (1729-1796). Dat was een pittig vrommes. Ze was intelligent, verzaemelde een prachtige keunstkollektie, ze was hervormingsgezind, mar ok een machtswellustelinge en losbaandig. Ze het hiel wat manluden versleten en dat hoefden echt niet allegeer preenzen, graven en markiezen te wezen Een mooie loslopende kavalerieluitenaant was heur lieke goed. As hij op bedde mar wat presteren kon. Ik bin dr meer as wisse van dat as die knappe Boer Tom uut Boer zuukt vrouw de koetsier van Catharina west was, dat ze him dan binnen de kotste keren bij heur op bedde had hadde! Hieronder een petret van Catharina de Grote. Een vrouw van fermaot uut de Russische geschiedenis! Een kanjer!


Naor de volgende bladziede - Naor de veurige bladziede