27 jannewaori – 17.00 – Vandemiddag he’k weer vuuf kilemeter lopen. Ik vule me d’r fitter van! Gister het iene me veurhullen da’k daegs zeker twie uren lopen moet. Omda’k een warkster en een tuunman hebbe, krie’k vusen te weinig beweging. Ik zitte mar wat en doe niks… Zo was de riddenaosie ongeveer. How, how, how! Ik doe zat! Mar ik warke… zittende! Nao et lopen he’k naor de tillevisie keken. Dat doe ’k overdag eins nooit, mar de herdaenking van 70 jaor bevri’jding Auschwitz wo’k vanzels beslist zien. Die indrokwekkende plechtighied is now nog an de gang.
  Ik hebbe een oold boek uut 1962 mit verhaelties van Simon Carmiggelt lezen. Mooi en eins hielemaole niet dateerd. Now ja, d’r komt nog een badhuus in veur en de tillefoons hebben nog dri’jschieven. Mar dat is juust wel aorig. Et hiet Dag opa en et gaot over de belevenissen mit zien kleinzeune, die bi’j him inwoont. Verhaelties over een kleinzeune, opa Simon en oma Tiny… Ik vun et een kostelik boekien. Carmiggelt schrift op een gegeven ogenblik de mooie zin: Want men kan niet vroeg genoeg leren dat we ons, als we prijs stellen op wat vreugd in dit leven, nu eenmaal moeten behelpen met de werkelijkheid. Politici hebben et altied over de kennis van now. As lezer lees ie een oold boek ok mit de kennis van vandaege-de-dag. Omdat Renate Rubinstein heur boek Mijn beter ik in 1991 uutkwam, weet ik now dat Simon Carmiggelt stiekem mit heur ommescharrelde en -donderjaegde. En… op die meniere an de daegelikse warkelikhied mit Tiny ontsnapte. Hieronder een foto van et broonzen beeld van Simon en Tiny dat sund 1990 in De Steeg staot en maekt is deur Wim Kuijl. Een jaormennig leden wodde et steulen en in stokken zaegd weerommevunnen in schuurties in Dieren en Doesburg. In 2012 wodde et restereerd en now zitten Simon en Tiny daor weer rustig op heur baankien. As was d’r nooit een Renate west….


26 jannewaori – 18.30 – In de Stellingwarven is eregister meer sni’j valen as in et Friese Frieslaand. Doe ’k vandemiddag in de buurt van Liwwadden ree, was daor al lange gien sni’j meer te zien. Hier liggen altied nog wat ressies… 
  En dan nog even over gister. Ik hebbe mooi vertellen kund op ’e tiende Midwinterverhaelemiddag in Workum. Ik hebbe vuuf keer een groep meensken bi’j me langes kregen die naor me kwam te luusteren. Mit mekeer ongeveer 120 man. Om kwat over viere bin ’k begonnen en ik was om goed zeuven ure klaor. Daornao he’k in et resteraant nog een happien vegetarische stamppot had en een stokkien waarm vruchtegebak. En ja, doe was et al acht ure doe ’k daor in Workum in de auto stapte en… om half negen begon Boer zuukt vrouw. Ik zol nooit en te nimmer in een half ure thuus wezen kunnen. Mar… ik hebbe overal mien kunde. Om twintig over achte ston ik in Sneek bi’j Jelle en Gerda veur de deure en omdat dat ok grote fans van et beroemde tillevisiepergramme binnen, he’k daor genoeglik mitkieken kund naor de wat overdreven en tuterige Grunninger Geert! Hieronder een foto van gistermiddag. Mien eerste pebliek komt om even nao vier ure de pottebakkeri’je in daor a’k vertellen moch. Ik hebbe d’r gister trouwens ok nog een optreden in Veenklooster op 17 meert 2016 an overhullen!


Naor de volgende bladziede - Naor de veurige bladziede