4 feberwaori 14.50 Grytsje Kingma stuurde me gister heur bundel Tzen dagen mit liedteksten toe. En as kedogien kreek dr zomar heur cd Wytfear bij! Dat is toch te gek! Dat hadde toch niet hoefd! Mar ik bin dr wel slimme bliede mit! Dat mooie lietien Doarp fan doe over heur geboorteplak Kimswerd staot dr ok op! Ik zal de cd in de auto drijen! Misschien dommiet drekt wel
  Ik stappe zo in de auto en dan gao k naor de internist in et ziekenhuus. De prednison helpt niks an now toe, dat mar es zien wat veur vervelende oplossings de man veur me uut de hoge hoed toveren gaot. Ik bin alle gedoe zo staorigan zo vreselike zat. Ik neme in et ziekenhuus een peer broties en wat drinken en dan zak perberen de zinnen wat te verzetten, want dan rie ik naor Jelle en Gerda in Sneek. Jelle, Gerda, Doutzen en ik zullen vanaovend, zoas ieder jaor, naor de Bonte Sneker Aovend. Een prachtige aovend in et Snekers! Tante Heabeltsje viert heur verjaordag in Theater Sneek en ze krigt alderhaande artiesten/vesite over de heerd. En netuurlik gaot tante ok weer hilarische verhaelen vertellen. Ik bin in 2007 mit heur op ien van de Sneker Aovens op petret kommen. Neffens mij het de Sneker stadsdichter Henk van der Veer onderstaonde foto doe maekt.


3 feberwaori 17.00 Een maond leden kreek op mien verjaordag een grote kraanze mit alderhaande poedegies voegelvoer en die hek in een boompien hongen vlak veur et raem van mien warkkaemer. Zo kan k de boel mooi in de gaten holen. Dr zit ok een poedegien mit aepeneuten in die nog in de doppen zitten. De kleine voegelties pikken gatties in de doppen en haelen op die meniere de neuties dr uut. Mar dr komt ok iederkeer een gruusaordige markloper langes. Mit zien grote, starke snaevel ropt hij in de boel omme en hij vret de aepeneuten mit doppe en al op. Et is een mooi gezicht! Al dat voegelspul het dr gien flauw idee van dak ze stiekem beloere en van heur geniete!
  Vandemiddag hek in Et Vene naor kapper Bertha west die me weer toonber maekt het. Dat ik kan vandeweke fesoenlik en netties de diek uut naor Sneek, Hindeloopen en Valkenswaard Dat laeste plak is wel een verhipt aende vot!
  Morgen gaot de tillevisie op zwat vanwege een fusie of zo. Dr kwam vandaege een brief van Ziggo. En ie moen de boel dan zels weer instellen. Dat kan k dus niet. In de brief staon ok tillefoonnommers diej bellen kunnen om hulpe. Dat hek daon, mar die nommers warken niet Ik wete niet hoe ak hier mit an moet En morgenmiddag moek naor et ziekenhuus, dat de tillevisie zal hier wel op zwat staon blieven.

Naor de volgende bladziede - Naor de veurige bladziede