6 feberwaori 17.00 De tillevisie staot hier altied nog op zwat. Ik hebbe gien idee hoe ak zoks weer aktiveren moet en et stappeplan dat Ziggo stuurd het snap ik vanzels niet. Iederiene snapt zoks vermoedelik, mar ikke niet. Ik wor aekelik van dat gedoe. Et vuult een betien as leef ik in een aander zien tied. Ik kan de technische dingen in disse tied al lange niet meer) bijholen en dat zal allienig mar slimmer wodden. Ik wezen doe k dr ok niet al te vule c.q. hielemaole gien muuite veur. Mar dingen die k graeg zien wil, zoas et nijs, kan k een dag of wat makkelik op e komputer bekieken. En zundagmorgen komt webmaster Jan en die maekt hier alles weer in odder. Ak technische vraogen hebbe, skype ik mit him. Dat dan weer wel. En mit zoen webcam kuwwe mekeer dan ok zien en bij mekeer in huus kieken. Ik zie dan een man mit een kop vol technische geleerdighied en hij iene mit een kop vol technisch zaegsel.
  Vandemiddag hek in Wolvege even op vesite west bij Jan zien moeder. Dat wodde ok wel weer es tied. En morgenvroeg moek al om zes ure van bedde. Mien hemel nog an toe! Ik zal de wekker mar zetten, aanders gaot et lichtkaans mis!

5 feberwaori 18.00 In Sneek het et gisteraovend best snijd. Et leek prachtig doe we uut Theater Sneek kwammen nao een prachtige Bonte Sneker Aovend. Et gong dr weer mal omweg, et volk lag dubbeld van et lachen. Tante Heabeltsje raekte onder een auto en belaande in et Antonius Ziekenhuus en daor gong et reer! Butendat vertelde ze van heur erverings bij de sportschoele daor ze mit heur buurvrouw Peereboom henne west was en hoe ze deur een masseur masseerd was Wat was et mooi! Staonde zong alleman an et aende et jaorlikse slotlied: Twee ogen zo blauw/Vier nachten op sjouw/Eerst met de buurfrou en dan met mien frou/Twee ogen zo blauw Now hek al verlangst naor de 15de Sneker Aovens van ankem jaor! De kaorties bin trouwens zomar vot! Tussen de twie- en drieduzend meensken gaon dr henne! Mar ja, doe mos ik nao middernaacht nog naor huus. De snelweg tussen Sneek en De Jouwer was poermin. De weinige autos reden niet hadder as 50 kilemeter. Nao De Jouwer was et beter en kon k wel weer goed 80 rieden. Doe k om goed ien ure thuus was, dee blieken dat hier lange zovule snij niet valen was as in Sneek. En ja, hoe laete ak ok thuuskomme, as de poezen mien auto heuren bin zij eerder bij de veurdeure as ik uut de auto! Dat die beide schatten van katten hek nog gezellig een ure in huus had. Ik moet nao zoen aovend eerst nog wel een ure zitten, aanders kan k niet slaopen.
  Vandemorgen hek eerst de oprit weer vrij van snij maekt en vandemiddag bin k naor et mooie stattien Hindeloopen west. Daor moch ik veur de oolderensoos vertellen in gebouw Irene. Ik was in 2001 en 2009 ok al es een keer bij heur west. Et was ok now weer hiel genoeglik. De veurige keer was de moeder van Joop Braakhekke dr nog bij, mar die is al over de honderd Dat die kan niet meer kommen. Hieronder twie fotos van vandemiddag van et wondermooie Hindeloopen.


Naor de volgende bladziede - Naor de veurige bladziede