8 feberwaori – 20.00 – Vandemorgen he’k Jan de webmaster mit de auto ophaeld uut Et Vene. Hi’j het mit een peer grepen de tillevisie weer in odder maekt. In een menuut hadde de goeie man et klaor. Ik hebbe daor groot ontzag veur. Dat ik kan vanaovend in alle rust naor Boer zuukt vrouw kieken. Dat is vanzels een hiele stiekel uut de voete! We hebben hier tussen de middag tegere sop en bolties eten, doe he’k him weer naor Et Vene brocht en bin ik, via Haarm en Jacob daor a’k even mit bi’jpraot hebbe, deurreden naor Sneek om daor de jaordag van kammeraod Jelle mit te vieren. Daor he’k zokrek sop en bolties had! Hieronder een foto die Haarm vandemiddag van me maekt het.


7 feberwaori – 20.20 – Wat mo’k vandemorgen gruwelik betied van bedde! Om goed zes ure! Pieter ston hier om kwat veur zeuven al mit de auto veur ’t huus en doe biwwe tegere naor Valkenswaard gaon. Dat was van Ni’jhooltpae of 260 kilemeter rieden. Hoe zudeliker awwe kwammen des te koolder as et wodde. In Ni’jhooltpae vreur et twie graoden, mar bi’j Arnhem zeuven graoden! In Valkenswaard was vandaege de jaorvergeerdering van Exlibriswereld in et Stiendrokmuseum. Nao de jaorvergeerdering was d’r tied om mit alderhaande meensken ruilen te kunnen. Dat he’k volop daon! Ok mit verschillende Belgische verzaemelders! In et museum hewwe ok nog de tentoonstelling De Eerste Wereldoorlog in steendruk bekeken. Mooi! Op ’e weerommereize hebben Pieter en ik zokrek in een wegresteraant bi’j Apeldoorn wat eten had. Et was een mooie dag! Hieronder een foto van vandaege. Van de Belgische grafikus Hedwig Pauwels (twiede van links) wodde een ni’je prente prissenteerd. Pauwels maekte vleden jaor veur de Grafiekmap 200 jaar Koninkrijk de petretten van Juliana en Willem-Alexander!


Naor de volgende bladziede - Naor de veurige bladziede