10 feberwaori – 17.20 – De laeste jaor of viere he’k iederiene die tiedens mien optredens een boek van me kocht daor een kedogien bi’j geven. Een deusien mit twie miniatuur honties. Zwatte en witte staonde of zittende setters. Ik hebbe op die meniere honderden en honderden deusies votgeven. Ik daenke da’k vandeweke de laesten votgeve en dan is alles op! Vandemiddag moch ik verhaelen vertellen veur de bejaordesoos in et Kruumtenhoes in Westerbork. Et was een hiele gezellige middag, al bin de optredens op ’t heden wel wat extra zwaor omda’k d’r al een weke dikke verkolen bi’j bin. Mar goed, altied deurzetten! Ik hebbe vandemiddag netuurlik ok et verhael Zulvergoed uut mien laeste boek Mit et waeter veur de dokter verteld. Et verhael daor Westerbork in veurkomt. Et Westerbork van de oorlog… Hieronder et Westerbork van vandemiddag. Op ’e brink ston een riedende boerderi’jewinkel waor aj’ keze en zo kopen konnen..


9 feberwaori – 16.00 – Ik bin nog altied an et oprumen. Nao alle kaasten en kassies is now de boekekaaste al de beurt. Ik doe een fluttien boeken vot. Boeken daor a’k eins niet zovule mit hebbe, die ’k niet uutlezen hebbe omdat ze me tegenvullen. Die kun wel vot. Dan komt d’r plak veur ni’je boeken. Op et heden is d’r een Camilla Läckberg-aktie in de boekwinkels. Drie boeken van disse bekende Zweedse misdaodschriefster veur de pries van twieje. Ik hebbe drekt drie boeken van heur kocht: IJsprinses Oorlogskind en Engeleneiland. Ik hebbe ze nog niet lezen, mar ze bin ongetwiefeld mooi. Ik hebbe lessend wel een tillevisieserie over heur verhaelen bekeken. Prachtig! Schriefster Erica Falck en heur partner inspekteur Patrik Hedström lossen alderhaanden moorden op! Dat wodt genieten!
  Vandemiddag he’k vuuf kilemeter lopen veur de kondisie! Et is even deurzetten, mar et voldot me goed! 
  Ik drome de laeste tied iederkeer da’k weer bi’j de belastingdienst an de slag bin. Gisternaacht ok weer. Wat een naachtelik gesodemieter toch. Ik wil dat hielemaole niet. Vannaacht wa’k weer es mit Haarm op een vliegveld en zowwe argens naor toe. Dat droom ik ok wel vaeker. Et verleden spoekt me naachs meer en meer deur de kop henne. Now goed dan… Hieronder twie oolde foto’s. Et is van ’t jaor percies veertig jaor leden dat Haarm en ik van Schiphol naor Genua vleugen veur een vekaansie an de Italiaanse Rivièra. Links zit ik in de zoemer van 1975 vergeeld op een baankien in Diano Marina. Rechts zit Haarm op een muurtien in Portofino… Nog jong en strak in ’t vel.


Naor de volgende bladziede - Naor de veurige bladziede