14 feberwaori 18.00 Ondaanks de verstopte kop en de licht koorsige huud het mien stemme et gisteraovend goed hullen en hek lekker vertellen kund in Surhuustervene. Old soldiers never die Ik trof daor een gezellige groep meensken in De Lanteerne. Ik kreeg votdaolik al oranjegebak en ik hebbe een deusien berenburgbonbons mit naor huus kregen. Misschien bin die wel goed veur de verkooldhied!
  Vandemiddag bink op e Fochtel in oons Centrum veur Prentkeunst west. We hadden daor Eupen Dag. Et leup de hiele middag deur mit meensken die graeg even kieken wollen hoe de vroegere schoele veraanderd is in een prachtig kultuurcentrum. Een sieraod veur De Fochtel! De meensken weren enthousiast. Pieter gokte dat dr lichtkaans een dattig tot veertig meensken kommen zollen. Dr kwammen tussen de tachtig en negentig! Hieronder een foto van Rinnie en Christien die veur de happies en de draankies zorgden.


13 feberwaori 16.00 Vandemorgen hek veur de wissighied even naor de dokter west. Ik hebbe wat verhoging en de kop zit me vol. En ja, vleden jaor hak een zwaore longontsteking en dat soort grappen moek niet weer hebben. Mar de longen bin gelokkig goed. Ik hebbe neuzespray kregen. Dat kan dr ok nog wel bij. Ik hebbe now drie soorten medesienen veur de daarms, spul veur de ogen en spul veur de neuze Wat een gesodemieter. Et hangt me kilemeters tot de strotte uut.
  Ik bin mitien ok mar naor de brilleman west. Ik hebbe mien nije brille now twie weken en ik bin dr niet hielemaole tevreden mit. In huus mit et lezen, komputeren en tillevisiekieken is hij wel goed, mar butendeure en in de auto zie k mit de oolde brille krek een betien scharper en makkeliker. Dat ze zullen dr weer mit an de gang. Wodt vervolgd.
  Vanaovend zak toch mar vot te vertellen. Dat mag wel van de dokter. Et is gien groot en langdurig optreden. Ik gao naor een buurtverieninge, die bij mekeer komt in De Lanteerne in Surhuustervene. Ik bin in et verleden meerdere keren in De Lanteerne west te vertellen. Et is dus een bekend plak veur me. Nao vandaege schrap ik een peer ofspraoken, die in mien agenda staon. Even kalm an 
  Ik moet de laeste daegen wel es an 1938 daenken. Doe reisde Chamberlain naor Hitler. Now reisden Merkel en Hollande naor Poetin. De vraoge is aj diktaters vertrouwen kunnen en daor ofspraoken mit maeken kunnen. Doe kon et niet. Ik daenke dat et een illusie is om te daenken dat et now wel kan. Hieronder de beroemde foto van Neville Chamberlain op een Engels vliegveld, nao zien reize naor Munchen, mit in de haand et verdrag dat Hitler en hij tekend hadden. Et bleek een voddegien pepier te wezen dat gien weerde hadde.


Naor de volgende bladziede - Naor de veurige bladziede