16 feberwaori 16.20 As mien moeder almar deurleefd hebben zol, zol ze vandaege 106 jaor wodden wezen. En ok al is ze dr now al haost 19 jaor niet meer, dit blift een biezundere dag. Zoas altied hek op et karkhof een keersien opsteuken. Hieronder een gedicht. Nao al die jaoren. Hoe awwe et indertied beter en verstaandiger doen kund hadden Mar ja, we hebben spietig genoeg mar ien leven. En dat overdoen kan niet.

Moeder

Zo graeg zok willen dak je nog es zag,
daj op een dag inienend veur me stonnen.
We praoten konnen over alles wawwe
indertied niet dusten, omdawwe wussen
dat ieder woord oons slim bezeren kon.
De waorhied as een groot geheim
oons algedurig in de wege ston.

Een leven laank mekeer an ien stok deur
ontzien en juust dat zwiegen, dat dee zeer.
En now, nao al die jaoren nao je dood,
as bloedrood soms de zunne ondergaot,
stao k veur et raem en kieke ak je argens zie.
Et kiend in mij dat longert naor een nij begin,
oprecht en onbedocht en tegen beter weten in.


15 feberwaori 17.00 Ik hebbe een peer evenementen, daor ak naor toe zol, toch mar even schieten laoten. Gisteraovend was dr hier een tenielaovend in oons eigen mfc. De tenielgroep van Nijhooltpae speulde et stok De goede gokker. Mar doe k gister tegen zessen thuuskwam van De Fochtel hak mien nocht wel en dus gien nocht meer en gao de deure nog uut. Een aandere keer beter! Een meens kan niet alles.
  Vandemiddag hak naor et literaire konsert Het motet voor de kardinaal in de roomse karke van Et Vene zuld. Theun de Vries schreef de roman mit dezelde naeme in 1960. Mitwarkers an et konsert: Vocaal ensemble Hortus Vocalis, ensemble Rabaskadol, Lex van Sante (luit) en kammeraod Douwe Kootstra. Hij was gisteraovend in Burgum en vandemiddag in Et Vene de vertelder. Ik hadde dr graeg henne wild, mar ik hebbe mezels beloofd dak et even kalm an doen zal. Ik hebbe een ofspraoke veur morgenmiddag ok ofzegd, zodak de agenda veur de eerste daegen now mooi leeg hebbe. Ik wil even niks!
  Ik hebbe wel een boekien lezen: De liefde tussen mens en kat van Willem Frederik Hermans. Et boekien wodde uutgeven in opdracht van de Bijekrf bij gelegenhied van de literaire boekemaond, die in meert 1985 in de winkels van de Bijekrf hullen wodde. En veerder zit ik bijtieden mit de kop boven een schaole hiet waeter te stomen en arger ik me 
  Hieronder een mooie anweenst veur mien grafiekverzaemeling die k dr gister veur een weke in Valkenswaard bijkregen hebbe. Een hooltgravure van de bekende grafikus Thijs Mauve (1915-1996). Don Quichot en Sancho Panza vechten tegen de wiendmeulen.


Naor de volgende bladziede - Naor de veurige bladziede