22 feberwaori – 17.00 – Ik hebbe van ’t jaor weer een protte sukses mit et in de bluui kriegen van mien ammarillen. Eerst docht ik dat et niks wodden zol, mar ik hebbe now toch al in acht van de elven knoppen zitten. In twieje van de achte he’k zels twie knoppen! Dat is een prima risseltaot. Vleden jaor ha’k trouwens alle elven in de bluui! Butendat he’k op et ogenblik acht orchidenen in de bluui of tegen de bluui an zitten!
  Vandemorgen he’k op jaordagsvesite naor Et Vene west. Haarm is vandaege 64 jaor wodden. Nog ien jaor en dan krigt hi’j ok van Drees! Een protte verjaordagsvesite zat te kochelen en te snotteren… Hier in et dörp, even aachter mien huus, zag ik vier hatten in een hoeke laand lopen te weiden. Dat is hiel mooi!
  Vandemiddag he’k, omdat et mooi en zunnig weer was, weer vuuf kilemeter lopen. Onderwegens he’k drok foto’s maekt en doe ’k thuuskwam ontdekte’k dat d’r gien geheugenkaortien in et toestel zat. Et wodt hadde minder mit me!

21 feberwaori – 17.00 – Een schoffien leden bin ’k deur Dick van Niekerk interviewd veur Locomotie, et tiedschrift van de Onofhaankelike Senaotsfraktie van de Eerste Kaemer. Eregister kree’k een stokmennig exemplaoren van et tiedschrift toestuurd. Et interview beslat vier bladzieden en in appatte kaders wodt andacht geven an wat veur tael et Stellingwarfs is en de Nijntje-vertaelings in de verschillende streektaelen van oons laand. Et zicht d’r allegeer keurig uut. Ze hebben onderstaonde sportieve foto van me bi’j et artikel ofdrokt. Een zoemerse en fleurige schriever in de boot op et Friese waeter! Was et mar weer zoveer!


Naor de volgende bladziede - Naor de veurige bladziede