20 november – 16.40 – Gistermiddag hewwe hier in oons mfc een vergeerdering had van de Anbo ofdieling Berkoop/Ni’jhooltpae. In et hiele laand is grote onrust wat de Anbo anbelangt. Een protte meensken bin et niet iens mit de koers die et heufdkantoor in Woerden veert. Tal van ofdielings gaon bi’j de Anbo weg en beginnen een eigen seniorenverieninge. Dat is hier gister ok gebeurd. Ik hebbe mien lidmaotschop drekt ok opzegd. Mien moeder zat indertied in et bestuur van de Anbo van Ni’jhooltpae en ik bin drekt lid wodden doe ’k vuuftig jaor wodde. Dat heurde eins zo. En now bin ’k dus lid wodden van de OSON, de Onofhaankelike Seniorenverieninge van (Oolde)berkoop en Ni’jhooltpae. De hieleboel kan daor in Woerden wel over de kop gaon. Now ja, die zo wil, die zo zal! Eigen schuld, dikke bult!
  Ik gao now naor Fokje toe te eten en dan rie ik naor Katliek. Daor ma’k om acht ure een ure vertellen in et Thomaskarkien veur de meensken van et dörp. In 2003 bin ’k d’r eerder west te vertellen, dat ik hebbe now aandere verhaelen uutzocht. Nao et schoft treden Hester & Femke op, die zingen lieties.

19 november – 16.30 – Vandaege begint Klasien Dijkstra-van der Meer uut Ooldege in de studio in Sneek mit et veurlezen van mien laeste roman Een vrouw van ivoor veur blienden en meensken die min zien kunnen. Dit is lichtkaans al et tiende boek in et Stellingwarfs dat ze op die meniere veurlest. Dat is hiel mooi! Mar et is vermoedelik ok et laeste. In de toekomst willen ze gien Stellingwarver boeken meer. Nog wel Friese boeken…
  Gistermiddag en -aovend het Jan de webmaster hier west. As die hier is bin d’r meerstal de meerst verschrikkelike technische perblemen an de haand. Vleden weke he’k een ni’j mobieltien kocht en mitien ok een aander kpn-pakket neumen. Dat was goedkoper zee de vlotte, jonge verkoper. Dat is ok zo, mar daor komt nogal wat bi’j kieken en dat ha’k vanzels niet in de gaten. Ankem weke woensdag wodt mien tillefoon en internet ofsleuten en dan moet d’r een ni’j modem ansleuten wodden. Ik kriege now tillefoon via internet… Mien hemel nog an toe. Goddaank da’k webmaster Jan in zokke tieden aachter de haand hebbe. Hi’j het hier gister twie ni’je losse tillefoons instelleerd en ankem woensdag slöt hi’j dat ni’je modem an. Dat moet trouwens nog over de post kommen… Ik hole hielemaole niet van zokke veraanderings! Ik snappe ok nargens wat van. Jan het ok nog gauw een ’muuilik’ laampien in een laampe zet. Dat lokte mi’j ok niet. En… hi’j het ien van mien fototoestellen mit iene drok op een knoppien weer gangber maekt. Ik raeke altied doodop van zoe’n technische sessie! Mien webmaster, die goold weerd is, het me doe ok nog mit mien weer goed warkende toestel op petret zet. De Stellingwarver schriever mit een stokkien eigenbakte koeke. Now ja, dat kan ’k dus wel. Koeken bakken, de katten aaien en boeken schrieven. Et is meer as niks, mar toch…


Naor de volgende bladziede - Naor de veurige bladziede