24 november – 16.30 – Wat een gedoe mit kpn. In de brief van heur ston da’k een ni’j modem hebben mos now de boel veraandert. Mar dat kwam mar niet en morgen wodt de boel hier ofsleuten. Dat ikke gistermiddag naor kpn bellen. Nee, ik hoefde gien ni’j modem, die brief klopte niet. Mar neffens Jan de webmaster moe’k wel degelik een ni’j modem, dat we bin vandemorgen tegere naor de kpn-winkel in Et Vene west en… hebben daor een modem mitkregen. Wat een gestuntel van kpn! Mar… de mannen in die kpn-winkel helpen je goed! As et morgen now mar goed gaot…
  Ik hebbe de roman De dochter van de imker van Santa Montefiore lezen. Een mooi boek. Grace Hamblin trouwt in 1937 mit heur jeugdliefde Freddie, mar ze hadde eins liever trouwen wild mit de knappe graaf Rufus… As Freddie uut de oorlog weerommekomt is de man kepot en… hi’j het een groot geheim daor hi’j niet over praoten kan. Van heur huwelik is weinig meer over. De roman speult ofwisselend in de dattiger/veertiger jaoren en in de zeuventiger jaoren. Trixie, de dochter van Grace en Freddie wodt in die tied verliefd op Jasper, de zanger van een Britse rockband. Ze beleven een heerlike zoemer op een klein eilaantien bi’j de kust van Cape Cod, mar dan moet Jasper weeromme naor Engelaand omdat zien ooldere breur wegraekt is en hi’j et laandgoed overnemen moet. Jasper bliekt een zeune van Rufus te wezen…Ik hebbe et boek in iene goeze uutlezen!


23 november – 16.20 – Vandemorgen he’k wat boekeboel bi’j de Schrieversronte weghaeld veur de verkope, want dat moet vanzels wel deurgaon. En ik hebbe alle verhaelen rippeteerd die ’k woensdagmiddag in Akkrum vertellen zal.
  Vleden zaoterdag he’k et alderlaeste exemplaor van mien roman Et geheim van de wiend verkocht. De roman is now allienig nog te koop in pattie boekhaandels zoas Zwikstra in Wolvege. De eerste drok van 1500 exemplaoren verscheen op 28 augustus 2009 tiedens een mooie kulturele aovend in mfc De Ni’je Stienze in Ni’jhooltpae. Ik gaf et eerste exemplaor an kesteelheer Gerrie (Gregorius) Halman uut Blesdieke en wodde die aovend interviewd deur kammeraod en Friese schriever Douwe Kootstra. In 2010 kwam d’r een twiede drok van 1000 exemplaoren uut. Antallen die ’k nooit weer haelen zal. De goeie oolde tied is veurgoed veurbi’j. Veur dit boek kree’k in 2010 de Streektaelpries 2009 van et Dagblad van et Noorden. Dat he’k dan toch mar veur mekeer bokst! Hieronder een foto van die kulturele aovend in 2009 die maekt wodde deur Jan (de webmaster) Meijer. De iene schriever interviewt de aandere.


Naor de volgende bladziede - Naor de veurige bladziede