26 november 17.00 Vandemiddag hek Koosje op vesite had. Ze hadde nog een kedogien van me tegoed en dat hadde ik heur vanzels heuren te brengen. Mar ze het et dus zels ophaeld. Ik hebbe heur eigenmaekt appelgebak veurzet en now mar hopen dat ze daor gien miskommen van kriegen zal. We hebben gezellig bijpraot. Zoks moet zo now en dan!
  En ja, dr is vandaege een dagboekstokkien en dus is gister alles goed verlopen. Ik hebbe Jan de webmaster gistermorgen ophaeld om de boel hier opnij an te sluten. Hij kwam mit ongeveer zes tassen vol ark Dr is dus nogal wat gebeurd! Dr zit hier now een groter modem tegen de mure. En wonder boven wonder warkt alles: tillefoon en internet. De tillefoon gaot now via internet, hek begrepen. We hebben hier gistermiddag tegere bolties en tomatesop eten. Boris en Joris zatten bij oons bij de keukentaofel. Webmaster Jan snee op een gegeven mement een grote plakke oolde keze of en voerde dat de katten op. Boris en Joris vienen now dat die man hier mar es vaeker kommen moet te eten!
  Et optreden veur de Anbo in Akkrum gong gistermiddag prima. Nao ofloop kwammen dr verscheiden meensken bij me om me te bedaanken veur de mooie middag. Dat is mooi! Mar ok daor wodt de Anbo opheven. Ze won daor een soortement onderofdieling van de nije seniorenverieninge van Et Vene. In Et Vene bin ze ok bij de Anbo weggaon. De leegloop is in volle gang. Hieronder nog een foto van gistermiddag. Dit is de aachterkaant van hotel Goerres (et witte gebouw) in Akkrum. Doe we vandezoemer een dag mit de boot uut veren weren hewwe tussen de middag op dit terras an et waeter heerlik eten!


25 november 8.30 Vandemiddag zak verhaelen vertellen veur de leden van de Anbo in zorgcentrum Leppehiem in Akkrum. In 1999 en 2013 bin k dr eerder west te vertellen. Et wodt grif een genoeglike middag!
  Mar as de dag veerder zo genoeglik wodt dat staot nog te bezien. De tillefoon en internet won vandaege ofsleuten en alles moet opnij ansleuten wodden. Dat zal webmaster Jan vandemorgen doen. Ik haele him zo op uut Et Vene en brenge him laeter, onderwegens naor Akkrum, weer thuus. En dan mar hopen dat alles warkt ak vanaovend weer thuuskomme Ik wete now dus even niet ak de kommende daegen wel te berieken bin en as dr morgen wel een dagboekstokkien komt We zullen et allemaole wel zien.

Naor de volgende bladziede - Naor de veurige bladziede