28 november 18.00 Et was weer es een slim roezige dag. Vandemorgen om negen ure hek in resteraant Hof van Schoterlaand in Mildam een peer taofels mit boeken inricht, want et was Wintermark in Mildam! Vleden jaor hek daor veur de eerste keer staon. Mar ik mos vandemorgen ok naor de naojaorsvergeerdering van de Stichting Nobilis op e Fochtel. Dat doe k de boekekraom inricht hadde kwam mien redder in de nood, Ypie, vanuut Wolvege. Zij het de boel vandemorgen in Mildam bemand en ik hebbe op e Fochtel in et Centrum veur Prentkeunst vergeerderd. Ik bin daor om twaelf ure weer weggaon en doe weeromme naor Mildam jakkerd. Daor wak om goed half iene. Ypie is halverwege de middag naor huus gaon en ik bin tot vuuf ure bleven. Et was bijtieden drok en we hebben best verkocht! Hieronder een foto van de grote zael van Hof van Schoterlaand daor awwe oons boekekraompien hadden. In disse zael hek ok meerdere keren as vertelder aktief west.


27 november 18.00 Vandemiddag hek verhaelen verteld in zorgcentrum Riemsoord in Appelsche. Ik was daor eerder te vertellen in 1999, 2012 en 2014. Krek as de veurige keren was et een genoeglike middag! Een man van 94 jaor, die k al hiel arg lange kenne, zee tegen me dat de wereld dr nog nooit zo beroerd veurstaon het as vandaege-de-dag. Vanwege et klimaot en zo Ik bin et hielemaole mit him iens. We daansen mit mekeer op e raand van een vulkaan.
  Ik mag op 11 december mitdoen an et pergramme De Literaire Hemel in kef De Amer in et Drentse drp Amen. De Literaire Hemel wodt maekt en prissenteerd deur Albert Haar en Annette Timmer. Ik zal daor een half ure ondervraogd wodden over mien nije roman Een vrouw van ivoor deur Albert Haar en ik leze ok wat uut et boek veur. In De Literaire Hemel bin altied drie schrievers te gaaste. Anna Enquist is dr die aovend ok, zij vertelt over heur nije dichtbundel Hoor de stad. De dadde gaast is literetuurkritikus Jaap Goedegebuure. Hij vertelt over de schriever Frans Kellendonk (1952-1990). Ik bin ien keer eerder in De Literaire Hemel west. Dat was in 2006, naor anleiding van mien roman Een brogge van glas. Mien boeken bin daor die aovend te koop bij et boekedissien van boekhaandel Iwema uut Assen. Dr is in De Amer plak veur 90 man pebliek. Ajm dr henne willen moejm rap wezen, dr bin al meer as 50 kaorties verkocht.

Naor de volgende bladziede - Naor de veurige bladziede