8 december – 19.30 – We hebben d’r vandaege een lange en mooie dag van maekt. We bin eerst naor Harlingen west en hebben daor wat drinken en lekkers had in et resteraant van et havengebouw van waor de boten naor Vlielaand en Terschelling veren. Vervolgens hewwe et mooie Hannemahuus bekeken. Wat is dat toch een mooi museum! Tussen de middag hewwe eten in Badhûs De Flevo pal an et Iesselmeer, in vekaansiepark De Holle Poarte in Makkum. En doe biwwe naor Franeker gaon. Daor hewwe et Eise Eisinga Planetarium nog es bekeken. Wat was et knap om dat indertied te maeken! We hebben mit een groep aandere bezukers uutleg in et Nederlaans en Engels kregen. In klerewinkel Lodewiek he’k me nog een mooi truigien mit bi’jpassende boezeroen kocht. Hieronder twie foto’s van Harlingen, doe was et nog heerlik, zunnig weer. In Franeker begon et laeter te regenen.


7 december – 16.00 – Ik hebbe et boek Wurden foar elkoar lezen. Een mooi boek! Et is uutgeven deur Elikser in Liwwadden. De bundel is saemensteld in opdracht van de perveensie Frieslaand as ofsluting van et projekt Bus fol ferhalen. De bi’jdregen in et boek bin schreven deur en veur reizigers. Et boek ligt in verschillende bussen en kan deur de passegiers lezen wodden. D’r staon mooie verhaelen in die schreven binnen in de verschillende taelen, die in Frieslaand praot wodden.Van kammeraod Douwe Kootstra staot et verhael Probleemke in et boek. En van kammeraod Harmen Houtman et verhael Et Duutse reisien. Haarm vertelt in dat verhael over et reisien dawwe mit oonze moeders an et aende van de zeuventiger jaoren maekten naor Königswinter. Tiedens die busreize kreeg Haarm zien moeder een hatstilstaand. Haarm het heur doe in de bus reanimeerd en zodoende et leven redded. Hi’j hadde zoks nooit eerder daon… D’r kwam al gauw een helikopter mit een dokter en mit mekeer biwwe doe mit een ziekenauto naor et ziekenhuus van Siegburg reden. Haarm zien moeder kreeg daor een pacemaker en mos d’r een schoffien blieven. We bin ok nog een keer mit de trein naor Siegburg toe west en bi’j heur op bezuuk west. We gongen in die tied wel vaeker mit iendaegse busreizen naor et butenlaand. Op 1 augustus 1981 gongen we naor Peries. Morgens slimme vroeg vot en aandere daegs kwammen we eerst in de naacht weeromme. Mar… we bin doe wel zes uren in Peries west en hebben daor alle belangrieke gebouwen zien. Zodoende bin oonze oolden daor toch west! Hieronder een foto die ’k op die dag maekt hebbe. Van links naor rechts: Haarm zien vader en moeder, mien moeder en Haarm. Mit op ’e aachtergrond de Eiffeltoren. Wat is dit al lange leden… en toch wee’k et allemaole nog as de dag van gister. In Königswinter bin ’k trouwens nog nooit west…


Naor de volgende bladziede - Naor de veurige bladziede